ഭുവനേശ്വര്: രണ്ടാം ഘട്ടത്തിലേക്ക് കടന്ന ഇന്ത്യന് സൂപ്പര് ലീഗ്(ഐഎസ്എല്) ഫുട്ബോളില് ഇന്ന് കേരള ബ്ലാസ്റ്റേഴ്സ് ഒഡീഷ എഫ്സിക്കെതിരെ പോരാടും. അവരുടെ തട്ടകമായ ഭുവനേശ്വറിലെ കലിംഗ സ്റ്റേഡിയത്തില് രാത്രി ഏഴര മുതലാണ് മത്സരം.
ഗോവയില് നിന്നും ഒന്നാം സ്ഥാനം തിരിച്ചുപടിക്കുന്നതിനൊപ്പം സീസണിലെ മറ്റൊരു എവേ മാച്ച് വിജയം കൂടി മുന്നില് കണ്ടാണ് ബ്ലാസ്റ്റേഴ്സ് ഇറങ്ങുന്നത്. അഡ്രിയാന് ലൂണ, ക്വെയിം പെപ്ര എന്നീ രണ്ട് സൂപ്പര് താരങ്ങളുടെ അഭാവത്തില് ദിമിത്രോവ് ഡയമന്റക്കോസിന്റെ ബലത്തിലാണ് കേരളം ഇനി ഈ സീസണില് പന്തു തട്ടുക. ലൂണയ്ക്ക് പരിക്കേറ്റ് നേരത്തേ പുറത്തായിരുന്നു. സീസണ് ഇടവേളയക്ക് പിരിഞ്ഞ അവസരത്തിലെത്തിയ സൂപ്പര് കപ്പ് ഫുട്ബോളിനിടെ പരിക്കേറ്റ പെപ്രയെ ഈ സീസണില് ഇനി കളിപ്പിക്കാനാകില്ലെന്നാണ് മെഡിക്കല് പരിശോധനകളില് നിന്നും വ്യക്തമായത്. പുതിയ സാഹചര്യത്തില് ബ്ലാസ്റ്റേഴ്സ് എങ്ങനെ കളിക്കുന്നുവെന്ന് വിലയിരുത്താനുള്ള അവസരം കൂടിയാകും ഇന്നത്തെ കളി.
ഇത്തവണത്തെ കരുത്തന് ടീമുകളിലൊന്നാണ് ഓഡീഷ എഫ്സി. സീസണില് 24 പോയിന്റോടെ ബ്ലാസ്റ്റേഴ്സിന് തൊട്ടുപിന്നില് മൂന്നാം സ്ഥാനത്ത് തുടരുകയാണ് ഒഡീഷ. ഇന്നലത്തെ കളിയില് ഹൈദരാബാദിനെതിരായ വിജയത്തിലൂടെ എഫ്സി ഗോവ ബ്ലാസ്റ്റേഴ്സിനെ മറികടന്ന് 27 പോയിന്റുമായി ഒന്നാം സ്ഥാനത്തെത്തി. നിലവില് 26 പോയിന്റാണ് ബ്ലാസ്റ്റേഴ്സിനുള്ളത്. ഇന്നത്തെ കളിയില് ജയിക്കാനായാല് നഷ്ടപ്പെട്ട ഒന്നാം സ്ഥാനം തിരിച്ചുപിടിക്കാനാകും. സമനില പിടിച്ചാല് ഗോവയ്ക്കൊപ്പമെത്തുമെങ്കിലും ഗോള് വ്യത്യാസത്തിന്റെ കാര്യത്തില് ഗോവയാണ് ബ്ലാസ്റ്റേഴ്സിനെക്കാള് മുന്നില്.
