ഐഐഎംസി: മലയാളം ജേര്‍ണലിസം കോഴ്‌സിന് അപേക്ഷ ക്ഷണിച്ചു

കോട്ടയം: കേന്ദ്ര സര്‍ക്കാരിന്റെ ഇന്ത്യന്‍ ഇന്‍സ്റ്റിറ്റിയൂട്ട് ഓഫ് മാസ് കമ്മ്യൂണിക്കേഷന്റെ (ഐഐഎംസി) കോട്ടയം കാമ്പസ് നടത്തുന്ന ഏകവര്‍ഷ മലയാളം ജേര്‍ണലിസം പോസ്റ്റ് ഗ്രാജുവേറ്റ് ഡിപ്ലോമ കോഴ്‌സിലേക്ക് അപേക്ഷ ക്ഷണിച്ചു. അവസാന തീയതി ഫെബ്രുവരി 29. ബിരുദമാണ് യോഗ്യത.

പരീക്ഷാഫലം കാത്തിരിക്കുന്നവര്‍ക്കും അപേക്ഷിക്കാം. ആഗസ്ത് ഒന്നിന് പൊതു വിഭാഗത്തില്‍ അപേക്ഷകന് 25 വയസും, എസ്‌സി/എസ്ടി/ഭിന്നശേഷി വിഭാഗക്കാര്‍ക്ക് 30 വയസ്സും, ഒബിസി വിഭാഗക്കാര്‍ക്ക് 28 വയസ്സും കവിയരുത്. ദല്‍ഹി കാമ്പസിലും, കോട്ടയത്ത് പാമ്പാടിയിലുള്ള കാമ്പസിലും മാര്‍ച്ച് 10ന് പ്രവേശന പരീക്ഷ നടക്കും.

പൊതുവിജ്ഞാനം, ഭാഷയിലെ അറിവ്, പത്രപ്രവര്‍ത്തന അഭിരുചി തുടങ്ങിയവ പരിശോധിക്കുന്നതാവും ചോദ്യങ്ങള്‍. മാര്‍ച്ച് 20ന് ഫലം പ്രഖ്യാപിക്കും. ജനറല്‍ വിഭാഗത്തിന് 800 രൂപയും, ഒബിസി/ഇഡബഌുഎസ് വിഭാഗത്തിന് 600 രൂപയും, എസ്‌സി/എസ്ടി/ തേര്‍ഡ് ജെന്‍ഡര്‍ വിഭാഗക്കാര്‍ക്ക് 550 രൂപയും, ഭിന്നശേഷി വിഭാഗക്കാര്‍ക്ക് 500 രൂപയുമാണ് പ്രവേശന പരീക്ഷ ഫീസ്.

അപേക്ഷഫോറത്തിനും, വിശദ വിവരങ്ങള്‍ക്കും www.iimc.gov.in എന്ന വെബ്‌സൈറ്റ് സന്ദര്‍ശിക്കുക. അപേക്ഷകള്‍ ഫെബ്രുവരി 29നകം ന്യൂദല്‍ഹി ഐഐഎംസിയില്‍ എത്തിയിരിക്കേണ്ടതാണ്. [email protected] എന്ന മെയിലിലേക്കും ബന്ധപ്പെട്ട രേഖകള്‍ സഹിതമുള്ള അപേക്ഷകള്‍ അയയ്‌ക്കാവുന്നതാണ്. കോട്ടയം കാമ്പസിലെ 8547482443, 9744838575 (മൊബൈല്‍), 8593800920 (വാട്ട്‌സ്ആപ്പ്) എന്നീ നമ്പറുകളില്‍ ബന്ധപ്പെടാം.