കൊല്ലത്തു നടന്ന സ്‌കൂള്‍ യുവജനോത്സവത്തില്‍ നാഗസ്വരം വിഭാഗത്തില്‍ മത്സരിക്കാന്‍ ആളുണ്ടായില്ല എന്ന വാര്‍ത്ത ഏറ്റവുമധികം വേദനിപ്പിച്ചിരിക്കുക നാഗസ്വരത്തിനായി ജീവിതം ഉഴിഞ്ഞുവച്ച തിരുവിഴ ജയശങ്കറെ ആയിരിക്കും.
ചേര്‍ത്തലക്കടുത്തുള്ള തിരുവിഴ എന്ന ഗ്രാമത്തിലാണ് ജയശങ്കറിന്റെ ജനനം. പിന്നീട് ആ ഗ്രാമം വിശ്വപ്രസിദ്ധമായത് ജയശങ്കറിലൂടെയായിരുന്നു എന്നത് മറ്റൊരു കൗതുകം. കോട്ടയം തിരുനക്കര ക്ഷേത്രത്തിലെ നാഗസ്വര വിദ്വാനായിരുന്ന മുത്തശ്ശനായിരുന്നു ജയശങ്കറിന്റെ ഗുരു.
ഇന്റര്‍മീഡിയറ്റിന് പഠിക്കുമ്പോള്‍ തന്നെ. മത്സരങ്ങളില്‍ കഴിവ് തെളിയിച്ചു. പിന്നീട് ആകാശവാണി നടത്തിയ മത്സരത്തില്‍ ഒന്നാമതെത്തുകയും, അന്നത്തെ രാഷ്‌ട്രപതിയായ ഡോ. രാജേന്ദ്രപ്രസാദില്‍ നിന്ന് പുരസ്‌കാരം വാങ്ങുകയും ചെയ്തു.
തൃപ്പുണിത്തുറ ആര്‍എല്‍വിയില്‍ ഗാനഭൂഷണം ഒന്നാം ക്ലാസ്സില്‍ പാസായ ജയശങ്കര്‍ ശെമ്മാങ്കുടിയുടെ ശിഷ്യനായാണ് ഗാനപ്രവീണ പൂര്‍ത്തിയാക്കിയത്.
ആകാശവാണി നടത്തിയ മത്സരത്തില്‍ ഉജ്വല വിജയം നേടിയത് ആകാശവാണിയില്‍ത്തന്നെ ജോലി ലഭിക്കാന്‍ ഇടയാക്കുകയും ചെയ്തു. മൂന്ന് പതിറ്റാണ്ടു കാലം സീനിയര്‍ പ്രോഗ്രാം അനൗണ്‍സറായി ജോലി ചെയ്തു.
ജോലിയിലിരിക്കെത്തന്നെ ലീവെടുത്ത് ഭാരതത്തിനകത്തും പുറത്തും ജയശങ്കര്‍ കച്ചേരികള്‍ നടത്തിയിട്ടുണ്ട്. തമിഴ് നാട്ടിലെ അതിപ്രശസ്തനായ തവില്‍ കലാകാരന്‍ വളയപ്പട്ടി സുബ്രഹ്മണ്യവുമൊത്ത് ജയശങ്കര്‍ നടത്തിയ കച്ചേരികള്‍ ഏറെ ജനപ്രീതി നേടിയിരുന്നു.
തമിഴ്‌നാട് സര്‍ക്കാരിന്റെ കലൈമാമണി പുരസ്‌കാരവും ഇശൈപേരറിഞ്ഞര്‍ പുരസ്‌കാരവും ലഭിച്ച ഏക മലയാളിയാണ് തിരുവിഴ ജയശങ്കര്‍. മലയാളി കലാകാരന്മാരെ നെഞ്ചേറ്റാന്‍ തമിഴര്‍ വിമുഖത കാണിക്കാറുണ്ടെങ്കിലും സ്വീകരിച്ചു കഴിഞ്ഞാല്‍ തലയിലേറ്റി നടക്കുന്നവരാണ് തമിഴര്‍ എന്നാണ് ജയശങ്കറുടെ അഭിപ്രായം.
വളയപ്പട്ടി-ജയശങ്കര്‍ കോമ്പോ തമിഴകത്തെ ഇളക്കിമറിച്ചപ്പോള്‍ തമിഴര്‍ ജയശങ്കറെയും തലയിലേറ്റി. ഒരിക്കല്‍ തമിഴ്‌നാട്ടിലെ കുംഭകോണത്തിനടുത്ത ഗ്രാമത്തിലെ പരിപാടിയെ പ്രമാദമെന്ന് ക്ഷേത്ര പൂജാരി.
തന്നെ പുകഴ്‌ത്തിയത് തന്റെ കലാജീവിതത്തിലെ അവിസ്മരണീയമായ അനുഭവമാണെന്ന് ജയശങ്കര്‍ പറയുന്നു ‘ഈ ജനുവരി 31 ന് 86 പൂര്‍ത്തിയാവുന്ന ജയശങ്കര്‍ ഇപ്പോഴും സാധകത്തിന് മുടക്കം വരുത്തിയിട്ടില്ല.
നാഗസ്വരത്തിന്റെ ആത്മകഥ എന്ന പുസ്തകമെഴുതിയിട്ടുള്ള അദ്ദേഹം താനും നാഗസ്വരവും രണ്ടല്ല എന്ന വിശ്വാസക്കാരനാണ്. പുതിയ തലമുറ നാഗസ്വരത്തിലേക്ക് തിരിച്ചുവരും എന്നത് തന്നെയാണ് തിരുവിഴ ജയശങ്കറിന്റെ ശുഭ പ്രതീക്ഷ.
ജന്മഭൂമി ഓണ്‍ലൈന്‍
പ്രതികരിക്കാൻ ഇവിടെ എഴുതുക: