കോഴിക്കോട്: സ്വാതന്ത്ര്യസമരസേനാനി കെ. ഉണ്ണീരി (100) ക്ക് വിട നല്‍കി നാട്. വാര്‍ധക്യസഹജമായ അസുഖത്തെ തുടര്‍ന്ന് വെള്ളിയാഴ്ച വൈകിട്ട് കക്കോടിയിലെ മകന്റെ വസതിയിലായിരുന്നു അന്ത്യം. ഔദ്യോഗിക ബഹുമതിയോടെ വെസ്റ്റ്ഹില്‍ ശ്മശാനത്തില്‍ സംസ്‌കാരം നടന്നു.
രാജ്യത്തിന്റെ സ്വാതന്ത്ര്യം ലക്ഷ്യമാക്കിയുള്ള പോരാട്ടങ്ങളില്‍ പ്രധാന കണ്ണിയായി പ്രവര്‍ത്തിച്ച സ്വാതന്ത്ര്യ സമരസേനാനികളിലൊരാളായിരുന്നു കക്കോടി സ്വദേശി കെ. ഉണ്ണീരി. ക്വിറ്റ് ഇന്ത്യാ സമരത്തിന്റെ ഭാഗമായും പ്രവര്‍ത്തിച്ചു. അക്കാലത്ത് രഹസ്യവിവരങ്ങള്‍ ലക്ഷ്യസ്ഥാനത്തെത്തിക്കുക എന്ന ഉദ്യമമായിരുന്നു ഉണ്ണീരി ഏറ്റെടുത്തിരുന്നത്.
ബ്രിട്ടീഷ് പടയുടെ കണ്ണുവെട്ടിച്ച് സാഹസികമായി അദ്ദേഹം അത് പൂര്‍ത്തിയാക്കുകയും ചെയ്തിരുന്നു. സ്വാതന്ത്ര്യം ലഭിച്ച സമയത്ത് തിമര്‍ത്തു പെയ്യുന്ന മഴയില്‍ നനഞ്ഞ് കക്കോടിയില്‍ നിന്ന് കോഴിക്കോട്ടേക്ക് ജാഥയായി പോയവരുടെ കൂട്ടത്തില്‍ മുന്‍നിരയില്‍ ഉണ്ണീരിയുമുണ്ടായിരുന്നു.
ഹജൂരാപ്പീസിനു മുന്നിലുള്ള മൈതാനിയില്‍ പതാകയുയര്‍ത്തി സ്വാതന്ത്ര്യദിനാഘോഷത്തില്‍ പങ്കെടുക്കുകയും ചെയ്തിട്ടുണ്ട് ഉണ്ണീരി. ഭാര്യ: പരേതയായ ജാനു. മക്കള്‍: പ്രേമലത, പുഷ്പലത, ഹേമലത, സ്‌നേഹലത, റീന, വിനോദ്കുമാര്‍, ബിന്ദു. മരുമക്കള്‍: രവീന്ദ്രന്‍, അശോകന്‍, കൃഷ്ണന്‍, ബാബു, മോഹന്‍രാജ്, സ്മൃതി, മനോജ്.
പ്രതികരിക്കാൻ ഇവിടെ എഴുതുക: