തിരുവനന്തപുരം: നിലമേലില് എസ്എഫ്ഐ ആക്രമണത്തിനെതിരെ റോഡരികില് ഇരുന്ന പ്രതിഷേധിച്ച ഗവര്ണറുടെ നടപടിയെ വിമര്ശിച്ച് ഇടതുമുന്നണി കണ്വീനര് ഇപി ജയരാജന്. ആരിഫ് മുഹമ്മദ് ഖാന് കേരളത്തിന് അപമാനമാണെന്നും അദേഹം ഇന്ന് റോഡില് നടത്തിയത് അഴിഞ്ഞാട്ടമാണെന്നും ജയരാജന് പറഞ്ഞു.
കേരളത്തിന്റെ ചരിത്രത്തില് ലക്കും ലഗാനും ഇല്ലാതെ ഏതെങ്കിലും ഗവര്ണര് ഇതുപോലെ പെരുമാറിയിട്ടുണ്ടോ. ഗവര്ണര് റോഡരികില് തന്നെ ഇരിക്കട്ടെ എന്നാണ് തന്റെ അഭിപ്രായമെന്ന് അദ്ദേഹം കണ്ണൂരില് വിളിച്ച വാര്ത്താ സമ്മേളനത്തില് പറഞ്ഞു.
ഒരു കുടയും കുറച്ചു വെള്ളവും കൊടുത്ത് അവിടെ തന്നെ ഗവര്ണറെ ഇരുത്തണമായിരുന്നു. പോലീസിനോട് എസ്എഫ്ഐക്കാര്ക്കെതിരെ കേസെടുക്കണം എന്ന് പറയാന് ഗവര്ണര്ക്ക് എന്ത് അധികാരമാണ് ഉള്ളതെന്നും അദേഹം ചോദിച്ചു. ആരിഫ് മുഹമ്മദ് ഖാനെ കേന്ദ്രം അടിയന്തരമായി തിരിച്ചുവിളിക്കണമെന്നും ജയരാജന് പറഞ്ഞു.
