വയനാട്: സ്വന്തം കൃഷിയിടത്തിലെ വൈദ്യുത വേലിയിൽ നിന്നും ഷോക്കേറ്റ് ദമ്പതിമാർക്ക് ദാരുണാന്ത്യം. ശിവദാസ്-സരസു ദമ്പതികളാണ് ഷോക്കേറ്റ് മരിച്ചത്. ഇന്നലെ വൈകുന്നേരം 4.30-ഓടെയായിരുന്നു സംഭവം. വീടീനോട് ചേർന്നുള്ള കൃഷിയിടത്തിൽ വന്യമൃഗങ്ങളെ തുരത്തുന്നതിനായി വൈദ്യുതി വേലി സ്ഥാപിച്ചിരുന്നു. ഇതിലേക്ക് വൈദ്യുതി പ്രവാഹമുണ്ടെന്ന് അറിയാതെ തട്ടിയപ്പോൾ ഷോക്കേൽക്കുകയായിരുന്നു എന്നാണ് പ്രാഥമിക നിഗമനം.
കുളത്തിൽ മോട്ടോർ സ്ഥാപിക്കുന്നതിനായാണ് ഇരുവരും ഇവിടെ എത്തിയത്. വൈദ്യുതി വേലി മറികടക്കവെ അബദ്ധത്തിൽ കാൽ തട്ടി ഷോക്കേൽക്കുകയായിരുന്നു. കൃഷിയിടത്തിനുള്ളിൽ ചെറിയ കുറ്റികൾ സ്ഥാപിച്ച് അതിൽ നൂൽക്കമ്പി കെട്ടിയാണ് വേലി സജ്ജമാക്കിയിരിക്കുന്നത്.ഇതിലേക്ക് കെഎസ്ഇബിയുടെ വൈദ്യുതി നേരിട്ട് നൽകിയിരുന്നു.
ഷോക്കേറ്റ വീട്ടമ്മയെ രക്ഷപ്പെടുത്താൻ ശ്രമിക്കവെയാണ് ശിവദാസനും ഷോക്കേറ്റത്. കൃഷിയിടത്തിലെ ചാലിൽ ചെളിയിൽ പുതഞ്ഞു കിടക്കുന്ന നിലയിലാണ് ഇരുവരെയും കണ്ടെത്തിയത്. നിലവിളി കേട്ട് ഓടിയെത്തിയ പ്രദേശവാസികളാണ് വൈദുതിബന്ധം വിച്ഛേദിച്ച് ഇരുവരെയും ്ആശുപത്രിയിൽ എത്തിച്ചത്. എന്നാൽ ഇരുവരുടെയും ജീവൻ രക്ഷിക്കാനായില്ല.
