ന്യൂദല്ഹി: ഇന്ത്യന് ഓപ്പണ് ബാഡ്മിന്റണ് പുരുഷ സിംഗിള്സില് മലയാളിതാരം എച്ച്.എസ്. പ്രണോയിയും പുരുഷ ഡബിള്സില് സാത്വിക് സായിരാജ് രങ്കിറെഡ്ഡി-ചിരാഗ് ഷെട്ടി സഖ്യവും ക്വാര്ട്ടറില്. ഇന്നലെ നടന്ന പ്രീക്വാര്ട്ടര് പോരാട്ടത്തില് മറ്റൊരു ഭാരത താരം പി. രജാവത്തുമായി മത്സരിച്ചാണ് പ്രണോയി വിജയിച്ച് മുന്നേറിയത്.
ഭാരത താരങ്ങള് നേര്ക്കുനേര് പോരാടിയ പുരുഷ സിംഗിള്സ് പ്രീക്വാര്ട്ടറിലെ ആദ്യ ഗെയിം ഏറെ വാശിയേറിയതായിരുന്നു. ഇഞ്ചോടിഞ്ച് പോരാട്ടത്തില് പ്രണോയിയെ കീഴടക്കി രജാവത്ത് ആദ്യഗെയിം സ്വന്തമാക്കി. പിന്നത്തെ രണ്ട് ഗെയിമുകളിലും അതിഗംഭീര തിരിച്ചടി നല്കി മലയാളിതാരം മത്സരം തന്റേതാക്കിമാറ്റുകയായിരുന്നു. കലുഷിതമായ പോരാട്ടം ഒന്നര മണിക്കൂര് വരെ നീണ്ടു നിന്നു. സ്കോര്: 20-22, 21-14, 21-14
ഡബിള്സില് ലോക രണ്ടാം നമ്പര് ജോഡികളായ സാത്വിക് സായിരാജ് രങ്കിറെഡ്ഡിയും ചിരാഗ് ഷെട്ടിയും അനായാസം മത്സരം സ്വന്തമാക്കി. വെറും 25 മിനിറ്റ് തികച്ച് വേണ്ടിവന്നില്ല പ്രീക്വാര്ട്ടര് വിജയത്തിന്. തായ്വാന് ജോഡികളായ യാങ് പോഹാന്-ലു ചിങ് യോ സഖ്യത്തെ നേരിട്ടുള്ള ഗെയിമുകള്ക്കാണ് ഭാരത സഖ്യം തോല്പ്പിച്ചത്. സ്കോര്: 21-14, 21-15
