തിരുവനന്തപുരം: സംസ്ഥാനത്ത് കഴിഞ്ഞവര്ഷം ഓണ്ലൈന് സാമ്പത്തികത്തട്ടിപ്പുകളിലൂടെ 23,753 പേര്ക്ക് നഷ്ടമായത് 201 കോടി രൂപ. ട്രേഡിങ് തട്ടിപ്പുകളിലൂടെ മാത്രം 3,394 പേര്ക്ക് നഷ്ടമായ 74 കോടി രൂപയും ഇതില്പ്പെടുന്നതായി പോലീസ് സൈബര് വിഭാഗം.
തട്ടിപ്പിനായി ഉപയോഗിച്ചിട്ടുള്ള 5107 ബാങ്ക് അക്കൗണ്ടുകളും 3289 മൊബൈല് നമ്പരുകളും 239 സോഷ്യല് മീഡിയ അക്കൗണ്ടുകളും 945 വെബ്സൈറ്റുകളും പോലീസ് സൈബര് വിഭാഗം ബ്ലോക്ക് ചെയ്തു. നഷ്ടപ്പെട്ട തുകയുടെ 20 ശതമാനത്തോളം തിരികെ പിടിക്കാന് സാധിച്ചു. എറണാകുളം തൃക്കാക്കര സ്വദേശിയില് നിന്ന് രണ്ടുകോടി 60 ലക്ഷം രൂപയും ആലുവ സ്വദേശിയില് നിന്ന് ഒരുകോടി 10 ലക്ഷം രൂപയും കോഴിക്കോട്, ആലപ്പുഴ സ്വദേശികളില് നിന്ന് 50 ലക്ഷം രൂപയും കഴിഞ്ഞ ഒരാഴ്ചയ്ക്കിടെ തട്ടിപ്പിലൂടെ നഷ്ടമായതായി. പണം നഷ്ടമായി രണ്ടു മണിക്കൂറിനുള്ളില് 1930 എന്ന സൈബര് ഹെല്പ്പ് ലൈന് നമ്പറില് വിവരം അറിയിച്ചാല് പണം തിരികെ പിടിക്കുന്നതിനുള്ള സാധ്യത വളരെ കൂടുതലാണെന്ന് പോലീസ് അറിയിച്ചു.
