ന്യൂദൽഹി: ഖത്തർ, മാലദ്വീപ്, മലേഷ്യ തുടങ്ങി 62 രാജ്യങ്ങളിലേക്ക് ഭാരതീയർക്ക് ഇനി വിസയില്ലാതെയോ ഓൺ അറൈവൽ വിസയിൽ യാത്ര ചെയ്യാം. ഇന്റർനാഷണൽ എയർട്രാൻസ്‌പോർട്ട് അസോസിയേഷന്റെ ഡാറ്റയുടെ അടിസ്ഥാനത്തിലാണ് പാസ്പോർട്ട് സൂചിക റാങ്കിങ് ഈ വിവരം അറിയിച്ചിരിക്കുന്നത്. അടുത്തിടെ ഹെൻലി പാസ്പോർട്ട് സൂചിക 2024 പുറത്തുവിട്ട കണക്കനുസരിച്ച് 62 രാജ്യങ്ങളിലേക്ക് ഭാരതത്തിന്റെ പാസ്പോർട്ടുള്ളവർക്ക് വിസയില്ലാതെ യാത്ര ചെയ്യാം എന്നാണ്. പട്ടികയിൽ എൺപതാം സ്ഥാനത്താണ് ഭാരതം.
ഭാരതത്തിന്റെ പാസ്പോർട്ടുള്ളവർക്ക് വിസയില്ലാതെ സന്ദർശിക്കാവുന്ന രാജ്യങ്ങളുടെ പട്ടികയിൽ ജമൈക്ക, ബുറുണ്ടി, ഭൂട്ടാൻ, ബൊളീവിയ, ജിബൂട്ടി, ഫിജി, ഹെയ്‌ത്തി, ഇന്തോനേഷ്യ, ഇറാൻ, ജോർദാൻ, കസാഖ്സ്താൻ, കെനിയ, നേപ്പാൾ, ശ്രീലങ്ക, തായ്‍ലൻഡ്, മൗറീഷ്യസ് എന്നീ രാജ്യങ്ങളുമുണ്ട്. ഫ്രാൻസ്, ജർമനി, ഇറ്റലി, ജപ്പാൻ, സിംഗപ്പൂർ, സ്പെയിൻ എന്നീ ആറ് രാജ്യങ്ങളിലെ പൗരന്മാർക്ക് വിസയില്ലാതെ 194 രാജ്യങ്ങളിലേക്ക് യാത്ര ചെയ്യാം. ഈ വർഷത്തെ പട്ടികയിൽ ഈ ആറ് രാജ്യങ്ങളാണ് ലോകത്തിലെ ഏറ്റവും ശക്തമായ വിസ എന്ന നേട്ടം കൈവരിച്ചത്.
വിസയില്ലാതെ വെറും 28 രാജ്യങ്ങളിലേക്ക് പ്രവേശനമുള്ള അഫ്ഗാനിസ്താനാണ് പട്ടികയിൽ ഏറ്റവും താഴെയുള്ളത്. 29 ലക്ഷ്യസ്ഥാനങ്ങളിലേക്ക് മാത്രം വിസ രഹിത പ്രവേശനമുള്ള സിറിയയാണ് തൊട്ടുപിന്നിൽ. ഇറാഖ് 31 ഉം പാകിസ്താൻൻ 34 ഉം സ്ഥാനങ്ങളിലാണ്.
ഭാരതത്തിന്റെ അടുത്തിടെ വിവിധ മേഖലകളിൽ ഉണ്ടായ വികസനങ്ങളും ലോക രാജ്യങ്ങൾക്കിടയിൽ ലഭിച്ച സ്വീകാര്യതയും ഈ വിസാ നേട്ടത്തിന് കാരണമായെന്നാണ് വിദഗ്ധർ വിലയിരുത്തുന്നത്.
ജന്മഭൂമി ഓണ്‍ലൈന്‍
പ്രതികരിക്കാൻ ഇവിടെ എഴുതുക: