കൊല്ലം: കുടുംബ വഴക്കിനെ തുടര്ന്ന് രണ്ടു മക്കളെ കൊന്ന ശേഷം അച്ഛന് തൂങ്ങി മരിച്ചു. പട്ടത്താനത്ത് ചെമ്പകശേരിയില് ജവഹര്നഗര്-81ല് ജോസ് പ്രമോദ് (41), മകന് ദേവനാരായണന് (9), മകള് ദേവനന്ദ (4) എന്നിവരെയാണ് വീടിനുള്ളില് മരിച്ച നിലയില് കണ്ടെത്തിയത്.
മക്കളെ കൊന്ന ശേഷമാണ് ജോസ് ആത്മഹത്യ ചെയ്തതെന്നാണ് പോലീസിന്റെ പ്രാഥമിക നിഗമനം. ജീവനൊടുക്കുകയാണെന്ന് പറഞ്ഞ് ജോസ് സഹോദരനും ഭാര്യ ലക്ഷ്മി കൃഷ്ണയ്ക്ക് മൊബൈല് സന്ദേശം അയച്ചിരുന്നു. സന്ദേശം കിട്ടിയ ഭാര്യ അറിയിച്ചതനുസരിച്ച് ബന്ധുക്കള് വീട്ടില് വന്നു നോക്കിയപ്പോഴാണ് മൃതദേഹങ്ങള് കാണുന്നത്.
കുട്ടികളെ സ്റ്റെയര്കേസിന്റെ ഹാന്ഡ്റെയിലില് കെട്ടിത്തൂക്കിയ നിലയിലും ജോസ് മുറിയില് തൂങ്ങിമരിച്ചനിലയിലായിരുന്നു. രാവിലെയാണ് മരണ വിവരം പോലീസിനും ബന്ധുക്കള്ക്കും ലഭിക്കുന്നത്. ദേവനാരായണന് തങ്കശ്ശേരി ഇന്ഫന്റ് ജീസസ് സ്കൂളില് നാലാം ക്ലാസിലേയും ദേവനന്ദ ഒന്നാം ക്ലാസിലെയും വിദ്യാര്ത്ഥികളാണ്.
കുട്ടികളുടെ അമ്മ ഡോക്ടറാണ്. തിരുവനന്തപുരത്ത് താമസിച്ച് എംഡിക്ക് പഠിക്കുകയാണ്. ജോസും ഭാര്യയും തമ്മില് കുടുംബവഴക്കുകള് ഉണ്ടായിരുന്നുവെന്നും ഇതാകാം കൊലപാതകത്തിലേക്കും ആത്മഹത്യയിലേക്കും എത്തിച്ചതെന്നുമാണ് പോലീസിന്റെ നിഗമനം. ഇരുവരുടേതും പ്രണയവിവാഹമായിരുന്നു. ജോസിന് എട്ടു വര്ഷമായി ജോലിയില്ലായിരുന്നു. ഓട്ടോറിക്ഷ ഡ്രൈവറായിരുന്ന ഇയാള് പിന്നീട് ഗള്ഫില് പോയി. വീണ്ടും നാട്ടില് തിരികെ എത്തുകയായിരുന്നു. ജോസ് സ്ഥിരം മദ്യപാനിയായിരുന്നുവെന്നും പോലീസ് സൂചിപ്പിച്ചു.
