കൊച്ചി: കിഫ്ബിക്ക് വീണ്ടും സമന്സയച്ചതില് ഇ ഡിയോട് ഹൈക്കോടതി വിശദീകരണം തേടി. ഹര്ജി അടുത്ത ബുധനാഴ്ച ഹൈക്കോടതി വീണ്ടും പരിഗണിക്കും. ബുധനാഴ്ചയ്ക്കകം മറുപടി നല്കാനാണ് സിംഗിള് ബെഞ്ചിന്റെ നിര്ദേശം. സമന്സില് ഇ ഡി പഴയ കാര്യങ്ങള് ആവര്ത്തിച്ച് ചോദിക്കുന്നുവെന്ന് ചൂണ്ടിക്കാണിച്ച് കിഫ്ബി നല്കിയ ഹര്ജിയിലാണ് ഹൈക്കോടതി നടപടി.
ഇപ്പോള് ആവശ്യപ്പെട്ടിരിക്കുന്ന രേഖകളെല്ലാം നേരത്തെ തന്നെ നല്കിയതാണ്. നോട്ടീസ് നല്കാന് ഇ ഡിക്ക് അധികാര പരിധിയില്ലെന്നുമാണ് കിഫ്ബിയുടെ വാദം.
ജസ്റ്റിസ് ദേവന് രാമചന്ദ്രന് അധ്യക്ഷനായ സിംഗിള് ബെഞ്ചാണ് ഇ ഡിയോട് വിശദീകരണം തേടിയത്. കിഫ്ബി മസാലബോണ്ട് കേസില് മുന് ധനമന്ത്രി തോമസ് ഐസക്കിനോട് നേരിട്ട് ഹാജരാകാന് ആവശ്യപ്പെട്ട് ഇ ഡി പുതിയ നോട്ടീസ് അയച്ചിരുന്നു.
ഇന്നലെ ഹാജരാകാനായിരുന്നു ഇ ഡിയുടെ നിര്ദേശം. സിപിഎം സെക്രേട്ടറിയറ്റില് പങ്കെടുക്കേണ്ടതിനാല് ഇന്ന് ഹാജരാകാനാകില്ല എന്ന് തോമസ് ഐസക് ഇ ഡിയെ അറിയിക്കുകയായിരുന്നു. ഐസക് ഹൈക്കോടതിയെ സമീപിച്ചതിനെ തുടര്ന്ന് നേരത്തേ നല്കിയ നോട്ടീസ് ഇ ഡി പിന്വലിച്ചിരുന്നു.
അന്വേഷണം തുടരാന് തടസമില്ലെന്നും പുതിയ നോട്ടീസ് ഇ ഡിക്ക് അയയ്ക്കാം എന്നും ഹൈക്കോടതി ഈ ഉത്തരവില് വ്യക്തമാക്കിയിരുന്നു. ഇതേ തുടര്ന്നാണ് വീണ്ടും നോട്ടീസ് നല്കിയത്.
