കൊച്ചി:മെട്രോയില്‍ ഇനി വരി നില്‍ക്കാതെ ടിക്കറ്റെടുക്കാം. ഒരു മിനിട്ടിനുള്ളില്‍ ടിക്കറ്റ് ലഭിക്കും. ഇന്ന് മുതല്‍ സേവനം ലഭ്യമായി തുടങ്ങി.
യാത്രക്കാര്‍ ഏറെക്കാലമായി ആവശ്യപ്പെടുന്ന വാട്സ്ആപ്പ് ടിക്കറ്റ് ഉദ്ഘാടനം മെട്രോ ആസ്ഥാനത്ത് നടി മിയ ജോര്‍ജ് നടത്തി. ഇംഗ്ലീഷില്‍ ‘ഹി എന്ന സന്ദേശമയച്ച് സ്റ്റേഷനിലെത്തും മുമ്പ് വാട്സ്ആപ്പിലൂടെ ടിക്കറ്റെടുക്കാന്‍ കഴിയുന്ന സംവിധാനമാണ് സജ്ജമായത്.
9188957488 എന്ന വാട്സാപ്പ് നമ്പറിലേക്ക് ഇംഗ്ലീഷില്‍ ‘ഹി’ എന്ന് അയയ്‌ക്കുക. ശേഷം ക്വു ആര്‍ ടിക്കറ്റ് എന്ന ഓപ്ഷന്‍ തിരഞ്ഞെടുത്ത് ശേഷം BOOK TICKET ഓപ്ഷന്‍ എടുത്ത് യാത്ര ചെയ്യാന്‍ തുടങ്ങുന്നതും അവസാനിക്കുന്നതുമായ സ്റ്റേഷനുകള്‍ പട്ടികയില്‍ നിന്നും തിരഞ്ഞെടുത്ത് യാത്രക്കാരുടെ എണ്ണം രേഖപ്പെടുത്തണം. തുടര്‍ന്ന് പണമിടപാട് നടത്തിയാല്‍ ടിക്കറ്റ് ഫോണില്‍ ലഭിക്കും.
ഇങ്ങനെ ടിക്കറ്റെടുത്താല്‍ ടിക്കറ്റ് നിരക്കില്‍ 10 മുതല്‍ 50 ശതമാനം വരെ കിഴിവും കിട്ടും. ടിക്കറ്റ് ക്യാന്‍സല്‍ ചെയ്യാനും നമ്പറിലേക്ക് ഹായ് എന്ന് അയച്ചാല്‍ മതിയാകും. ക്യൂ ആര്‍ കോഡ് വഴി ബുക്ക് ചെയ്യുന്ന ടിക്കറ്റ് ഉപയോഗിച്ച് നാല്‍പത് മിനിറ്റിനുള്ളില്‍ യാത്ര ചെയ്യാന്‍ കഴിയും.
