മുംബൈ: അധോലോക നായകന് ദാവൂദ് ഇബ്രാഹിമന്റെ സ്വത്തുക്കള് ലേലത്തില് പിടിക്കാന് ഉത്സാഹം കാട്ടുന്ന അജയ് ശ്രീവാസ്തവയ്ക്ക് ഒരേയൊരു ലക്ഷ്യമേയുള്ളൂ- ദാവൂദിനെ അതുവഴിയെങ്കിലും തോല്പിക്കണം.
മുന് ശിവസേനനേതാവ് കൂടിയാണ് അഭിഭാഷകനായ അജയ് ശ്രീവാസ്തവ. ദാവൂദിന്റെ മാതാവ് ആമിന ബിയുടെ മഹാരാഷ്ട്രയിലെ രത്നഗിരിയിലുള്ള കാര്ഷിക സ്വത്തുവകകളാണ് ഇക്കഴിഞ്ഞ ജനുവരി അഞ്ചിന് വെള്ളിയാഴ്ച ലേലം ചെയ്തത്. അതില് കാര്ഷികസ്വത്തായ 170.98 ചതുരശ്രമീറ്റര് വിസ്തീര്ണ്ണമുള്ള കൃഷി ഭൂമി ലേലത്തില് പിടിച്ചത് അജയ് ശ്രീവാസ്തവയാണ്. 2.01 കോടി രൂപയ്ക്കാണ് ഇത് ലേലത്തില് പിടിച്ചത്. 15,440 രൂപയായിരുന്നു അടിസ്ഥാന ലേലത്തുക.
ദാവൂദ് താമസച്ചിടത്തെല്ലാം താമസിച്ച് ദാവൂദിനെ എനിക്ക് തോല്പിക്കണമെന്നാണ് അജയ് ശ്രീവാസ്തവ പറയുന്നത്. നേരത്തെയും ദാവൂദിന്റെ ചില സ്വത്തുക്കള് അജയ് ശ്രീവാസ്തവ ലേലത്തില് പിടിച്ചിട്ടുണ്ട്. ഇപ്പോള് ലേലത്തില് പിടിച്ച 170.98 ചതുരശ്രമീറ്റര് വിസ്തീര്ണ്ണമുള്ള കൃഷി ഭൂമിയ്ക്ക് ചുറ്റുമുള്ള സ്ഥലങ്ങളും വാങ്ങിയത് അജയ് ശ്രീവാസ്തവയാണ്. അതുകൊണ്ടാണ് ഈ സ്ഥലവും ലേലത്തില് വാങ്ങിയതെന്ന് അജയ് ശ്രീവാസ്തവ പറയുന്നു.
