ആലപ്പുഴ: രഞ്ജി ട്രോഫി ക്രിക്കറ്റില്‍ കേരളത്തിനെതിരെ ഉത്തര്‍പ്രദേശ് ശക്തമായ നിലയില്‍. എസ് ഡി കോളേജ് മൈതാനത്ത് നടക്കുന്ന മത്സരത്തില്‍ 59 റണ്‍സ് ലീഡുമായി രണ്ടാം ഇന്നിംഗ്‌സ് തുടങ്ങിയ ഉത്തര്‍പ്രദേശ് മൂന്നാം ദിനം വെളിച്ചക്കുറവ് മൂലം നേരത്തെ കളി നിര്‍ത്തുമ്പോള്‍ ഒരു വിക്കറ്റ് നഷ്ടത്തില്‍ 219 റണ്‍സെന്ന നിലയിലാണ്. ക്യാപ്റ്റന്‍ ആര്യന്‍ ജുയല്‍ 115 റണ്‍സ് നേടിയും പ്രിയം ഗാര്‍ഗ് 49 റണ്‍സോടെയും ക്രീസില്‍ തുടരുന്നു.
ഒരു ദിവസം ശേഷിക്കെ ഉത്തര്‍പ്രദേശിന് ഇപ്പോള്‍ 278 റണ്‍സ് ലീഡുണ്ട്. ഓപ്പണര്‍ സമര്‍ത്ഥ് സംഗിന്റെ വിക്കറ്റ് മാത്രമാണ് കേരളത്തിന്റെ ബൗളര്‍മാര്‍ക്ക് മൂന്നാം ദിനം വീഴ്‌ത്താനായത്.
മൂന്നാം ദിനം 220-6 എന്ന സ്‌കോറില്‍ ബാറ്റിംഗ് തുടങ്ങിയ കേരളം 243 റണ്‍സിന് പുറത്തായി. ഇതോടെ 59 റണ്‍സിന്റെ ഒന്നാം ഇന്നിംഗ്‌സ് ലീഡ് കേരളം വഴങ്ങി.
ഉത്തര്‍പ്രദേശ് ആദ്യ ഇന്നിംഗ്‌സില്‍302 റണ്‍സ് നേടിയിരുന്നു.കേരളത്തിന് വേണ്ടി വിഷ്ണു വിനോദ് 74 റണ്‍സ് നേടി. ഇന്നലത്തെ സ്‌കോറിനോട് ഒരു റണ്‍ പോലും ചേര്‍ക്കാതെ ശ്രേയസ് ഗോപാല്‍ (36) മടങ്ങിയതിന് പിന്നാലെ ജലജ് സക്സേന(7), ബേസില്‍ തമ്പി (2), വൈശാഖ് ചന്ദ്രന്‍ (5) എന്നിവരും പുറത്തായതോടെ കേരളത്തിന്റെ ഒന്നാം ഇന്നിംഗ്‌സ് ലീഡ് പ്രതീക്ഷ വെള്ളത്തിലായി. എം ഡി നിധീഷ് എടുത്ത 15 റണ്‍സാണ് കേരളത്തെ 243ലെത്തിച്ചത്.
ഉത്തര്‍പ്രദേശിനായി അങ്കിത് രജ്പുത് അഞ്ച് വിക്കറ്റ് വീഴ്‌ത്തി. കുല്‍ദീപ് യാദവിന് മൂന്ന് വിക്കറ്റ് ലഭിച്ചു.
പ്രതികരിക്കാൻ ഇവിടെ എഴുതുക: