നീലഗിരി: മൂന്ന് വയസുകാരിയെ പുലി ആക്രമിച്ചുകൊന്നു. തമിഴ്നാട് നീലഗിരിയിലാണ് സംഭവം.കുട്ടി അമ്മയ്‌ക്കൊപ്പം പോകവെയാണ് അമ്മയുടെ കണ്‍മുന്നില്‍ വച്ച് കുട്ടിയെ പുലി ആക്രമിച്ചത്.
ഝാര്‍ഖണ്ഡ് സ്വദേശികളായ കുടിയേറ്റ് തൊഴിലാളികള്‍ ശിവവശങ്കര്‍-ദേവി ദമ്പതികളുടെ മകള്‍ നാന്‍സിക്കാണ് ദാരുണാന്ത്യമുണ്ടായത്.പന്തല്ലൂര്‍ മേഖലയിലാണ് സംഭവം.
പന്തല്ലൂരിലെ തൊണ്ടിയാളത്തുവച്ചാണ് കുട്ടിയെ പുലി പിടിച്ച് കൊണ്ട് പോയത്.നാട്ടുകാര്‍ നടത്തിയ തിരച്ചിലില്‍ കുട്ടിയെ ഗുരുതര പരിക്കുകളോടെ, തേയില തോട്ടത്തില്‍ കണ്ടെത്തി. ഉടന്‍ തന്നെ ആശുപത്രിയില്‍ എത്തിച്ചെങ്കിലും രക്ഷിയ്‌ക്കാനായില്ല.പത്ത് ദിവസത്തിനിടെ ആറ് പേരെയാണ് പ്രദേശത്ത് പുലി ആക്രമിച്ചത്. പുലിയുടെ ആക്രമണത്തില്‍ പരിക്കേറ്റ വനവാസി വിഭാഗത്തില്‍പ്പെട്ട സരിത കഴിഞ്ഞ ദിവസം മരിച്ചു. രണ്ടു ദിവസം മുമ്പ് കളിച്ചുകൊണ്ടിരുന്ന നാലുവയസുകാരനെയും പുലി ആക്രമിച്ചു. കുട്ടി ആശുപത്രിയിലാണ്.
കഴിഞ്ഞ ഒരുമാസത്തോളമായി പ്രദേശത്ത് പുലി ശല്യം രൂക്ഷമാണെന്ന് പ്രദേശവാസികള്‍ പറയുന്നു. മൂന്ന് വയസുകാരി ഉള്‍പ്പെടെ രണ്ടുപേരാണ് പുലിയുടെ ആക്രമണത്തില്‍ മരിച്ചത്.
നാട്ടുകാര്‍ സ്ഥലത്ത് പ്രതിഷേധം നടത്തുകയാണ്. കേരളത്തിലെ നാടുകാണി ചുരമടക്കമുളള പ്രദേശങ്ങളിലേക്കുളള ഗതാഗതം തടസപ്പെട്ടിട്ടുണ്ട്.
പ്രതികരിക്കാൻ ഇവിടെ എഴുതുക: