അയോദ്ധ്യ: ശ്രീരാമജന്മഭൂമിയില് പൂജിച്ച അക്ഷതവുമായി എല്ലാ വീടുകളിലേക്കും ഇന്ന് മുതല് 15 വരെ രാമസേവകരെത്തും. നാടെങ്ങും കൊണ്ടാടുന്ന പ്രാണപ്രതിഷ്ഠാ മഹോത്സവത്തിലേക്ക് എല്ലാവരെയും ക്ഷണിക്കും. എല്ലാ ഗ്രാമങ്ങളിലും ഇതിനായുള്ള ഒരുക്കങ്ങള് പൂര്ത്തിയായി.
ഇന്ന് മുതല് 15 വരെയാണ് എല്ലാ ഗ്രാമങ്ങളിലും എല്ലാ വീടുകളിലും അക്ഷതവും രാമക്ഷേത്രത്തിന്റെ ചിത്രവും ലഘുലേഖയുമായി വിശ്വഹിന്ദുപരിഷത്തിന്റെയും ഹിന്ദുസംഘടനകളുടെയും നേതൃത്വത്തില് പ്രവര്ത്തകരെത്തുക. എല്ലാ സംസ്ഥാനങ്ങളിലും മഹാസമ്പര്ക്കത്തിന് ഇന്ന് തുടക്കം കുറിക്കും.
രാജ്യത്തെ അഞ്ചു ലക്ഷം ക്ഷേത്രങ്ങളില് അയോദ്ധ്യയിലെ പ്രാണപ്രതിഷ്ഠാ ചടങ്ങുകള് 22ന് രാവിലെ 11 മുതല് തത്സമയം കാണിക്കും. പത്തു കോടി വീടുകളിലേക്ക് ശ്രീരാമക്ഷേത്ര ഉദ്ഘാടന സന്ദേശം കൈമാറാനാണ് ശ്രീരാമജന്മഭൂമി തീര്ത്ഥ ക്ഷേത്ര ട്രസ്റ്റിന്റെ തീരുമാനം. പൂജിച്ച അക്ഷതം കലശങ്ങളിലാക്കി 45 കേന്ദ്രങ്ങളിലേക്ക് കൈമാറി. എല്ലാ സംസ്ഥാനങ്ങളിലും അക്ഷത കലശയാത്രകള്ക്ക് വന് ജനപങ്കാളിത്തമാണുള്ളത്.
ജനുവരി 22ന് പ്രധാനമന്ത്രി നരേന്ദ്രമോദിയുടെ നേതൃത്വത്തില് നടക്കുന്ന ചടങ്ങുകള് ക്ഷേത്രങ്ങളിലും മറ്റ് പ്രധാന കേന്ദ്രങ്ങളിലും തത്സമയം കാണിക്കുന്നതിനൊപ്പം രാജ്യത്തെ കോടിക്കണക്കിന് വീടുകളില് ശ്രീരാമജ്യോതിയും തെളിയിക്കും. ഓരോ വീട്ടിലും അഞ്ചു ദീപമെങ്കിലും തെളിയിക്കണം.
ലോകമെങ്ങുമുള്ള രാമഭക്തര് പ്രാണപ്രതിഷ്ഠാ ദിനത്തില് ദീപങ്ങള് തെളിച്ച് ഈ ഭവ്യമുഹൂര്ത്തത്തെ വരവേല്ക്കും. ഹനുമാന് ചാലിസ ചൊല്ലിയും ശ്രീരാമ ഭക്തിഗാനങ്ങള് പാടിയും ലക്ഷക്കണക്കിന് ഗ്രാമങ്ങള് അന്ന് അയോദ്ധ്യയാകും.
സംസ്ഥാനത്ത് 36,000 സമ്പര്ക്ക സംഘങ്ങള്
കൊച്ചി: മഹാസമ്പര്ക്ക യജ്ഞത്തിന്റെ ഭാഗമായി കേരളത്തിലെ 11,708 ഗ്രാമങ്ങളിലായി 50 ലക്ഷം വീടുകളില് അക്ഷതവും ലഘുലേഖയും എത്തും. ഒരു ഗ്രാമത്തില് മൂന്ന് ബാച്ചുകള് വീതം 36,000 സംഘങ്ങളാണ് ഗൃഹസമ്പര്ക്കത്തിനായി തയാറായിട്ടുള്ളതെന്ന് ശ്രീരാമജന്മഭൂമി തീര്ത്ഥ ക്ഷേത്ര സമിതി സംസ്ഥാന സംയോജകന് വി.ആര്. രാജശേഖരന് അറിയിച്ചു. അയോദ്ധ്യയില് പൂജിച്ച അക്ഷതവും രാമക്ഷേത്രത്തിന്റെ ചിത്രവും ക്ഷേത്രചരിതം അടങ്ങുന്ന ലഘുലേഖയുമായാണ് മഹാസമ്പര്ക്കം. തിരുവനന്തപുരം മുതല് കാസര്കോട് വരെ പതിനായിരം പൗരപ്രമുഖരെയും സമ്പര്ക്കം ചെയ്യും. പ്രാണപ്രതിഷ്ഠാ ചടങ്ങ് നടക്കുന്ന 22 ന് രാവിലെ 11 മുതല് 2 മണി വരെ കേരളത്തിലെ ചെറുതും വലുതുമായ ക്ഷേത്രങ്ങളില് പ്രത്യേകപൂജ, നാമജപയജ്ഞം, പ്രസാദ വിതരണം എന്നിവ നടക്കും. സന്ധ്യക്ക് എല്ലാ വീടുകളിലും ക്ഷേത്രങ്ങളിലും സ്ഥാപനങ്ങളിലും ദീപക്കാഴ്ച ഒരുക്കും.
