തിരുവനന്തപുരം : പമ്പുകള്ക്ക് നേരെ ഗുണ്ടാ ആക്രമണങ്ങളില് പ്രതിഷേധിച്ച് പെട്രോള് പമ്പുടമകള് ഇന്ന് സൂചനാ സമരം നടത്തും. ഞായറാഴ്ച രാത്രി എട്ട് മണിമുതല് തിങ്കളാഴ്ച പുലര്ച്ചെ ആറ് മണിവരെയാണ് സൂചനാ സമരം. ആള് കേരള ഫെഡറേഷന് ഓഫ് പെട്രോളിയം ട്രേഡേഴ്സ് ആണ് സമരത്തിന് ആഹ്വാനം ചെയ്തിട്ടുള്ളത്.
പെട്രോള് പമ്പുകള്ക്കുനേരെ ആവര്ത്തിച്ചുള്ള ഗുണ്ടാ ആക്രമണങ്ങളില് നടപടി വേണം. ഇത് തടയുന്നതിനായി ആശുപത്രി സംരക്ഷണ നിയമം പോലെ കൊണ്ടുവരണം. ഈ പ്രശ്നങ്ങള്ക്ക് പരിഹാരമുണ്ടായില്ലെങ്കില് മാര്ച്ച് പത്ത് മുതല് രാത്രി പത്ത് മണി വരെ പമ്പുകള് പ്രവര്ത്തിക്കുകയുള്ളുവെന്നും അസോസിയേഷന് അറിയിച്ചു.
അതേസമയം സമരത്തിന്റെ പശ്ചാത്തലത്തില് കെഎസ്ആര്ടിസിയുടെ യാത്രാ ഫ്യൂവല്സ് 24 മണിക്കൂറും പ്രവര്ത്തിക്കുമെന്ന് അധികൃതര് അറിയിച്ചു. തിരുവനന്തപുരം ഈസ്റ്റ് ഫോര്ട്ട്, വികാസ്ഭവന്, കിളിമാനൂര്, ചടയമംഗലം, പൊന്കുന്നം, ചേര്ത്തല, മാവേലിക്കര, മൂന്നാര്, മൂവാറ്റുപുഴ, പറവൂര്, ചാലക്കുടി, തൃശ്ശൂര്, ഗുരുവായൂര്, കോഴിക്കോട് എന്നിവിടങ്ങളിലാണ് കെഎസ്ആര്ടിസിയുടെ യാത്രാ ഫ്യൂവല്സുള്ളത്. 14 യാത്രാ ഫ്യൂവല്സ് ഔട്ട്ലെറ്റുകളും എന്നത്തേയും പോലെ 24 മണിക്കൂറും പ്രവര്ത്തിക്കുമെന്നാണ് കെഎസ്ആര്ടിസി അറിയിച്ചത്.
രാത്രിയിലും മറ്റുമായി പെട്രോള് പമ്പ് ജീവനക്കാരെ ആക്രമിച്ച സംഭവങ്ങള് പലയിടത്തായി റിപ്പോര്ട്ട് ചെയ്തിട്ടുള്ളതാണ്. എന്തായാലും പതുവത്സരത്തലേന്ന് രാത്രി പമ്പുകള് അടച്ചിടുന്നത് ആഘോഷങ്ങളെ മങ്ങലേല്പ്പിക്കാന് സാധ്യതയുണ്ട്.
