മജൂലി (ആസാം): തനിമയെ കാലാനുസൃതമായി ആവിഷ്‌കരിച്ച് അതിന്റെ അടിസ്ഥാനത്തില്‍ രാഷ്‌ട്രം മുന്നേറണമെന്ന് ആര്‍എസ്എസ് സര്‍സംഘചാലക് ഡോ. മോഹന്‍ ഭാഗവത്. ആസാമിലെ മജൂലിയില്‍ സാംഘിക്കില്‍ സംസാരിക്കുകയായിരുന്നു അദ്ദേഹം. സ്വാതന്ത്ര്യം നേടിയിട്ടും ഭാരതത്തിന് ആത്മനിര്‍ഭരത കൈവരിക്കാനായോ എന്ന് ചിന്തിക്കണം. സമാജത്തില്‍ ഐക്യവും രാഷ്‌ട്രസ്നേഹവും ഇല്ലെങ്കില്‍ സ്വാതന്ത്ര്യം അപകടത്തിലാകുമെന്നും അദ്ദേഹം കൂട്ടിച്ചേര്‍ത്തു.
ആര്‍എസ്എസ് പ്രവര്‍ത്തിക്കുന്നത് സമൂഹത്തില്‍ രാഷ്‌ട്രസ്നേഹവും ഐക്യവുമുണര്‍ത്തി നാടിനെ ആത്മനിര്‍ഭരതയിലേക്ക് നയിക്കുക എന്ന ലക്ഷ്യത്തോടെയാണ്. നാം
ആര്‍ജിച്ചതും പാരമ്പര്യമായി ലഭിച്ചതുമായ അറിവുകളുടെ കരുത്തില്‍ കാലത്തിന്റെ ആവശ്യങ്ങളെ അടിസ്ഥാനപ്പെടുത്തിയാവണം വികസനത്തിന് അടിത്തറ പാകേണ്ടത്. നമ്മുടെ അറിവിനോടൊപ്പം ആഗോള സമൂഹത്തില്‍ നിന്ന് ശ്രേഷ്ഠമായ അറിവുകളും സ്വായത്തമാക്കണം. ഭൗതികമായ ആഗ്രഹങ്ങളുടെ അടിസ്ഥാനത്തില്‍ സൃഷ്ടിച്ച തെറ്റായ മാതൃകകള്‍ മൂലം ലോകമെമ്പാടും നിരവധി പ്രശ്നങ്ങളുണ്ടായത് കഴിഞ്ഞ നൂറ്റാണ്ടുകളില്‍ നാം കണ്ടു. ഭാരതം മുന്നോട്ടുവച്ച മാതൃകകള്‍ സമൂഹത്തിന്റെ എല്ലാ മേഖലകളെയും സ്വയം പര്യാപ്തമാക്കാന്‍ പ്രാപ്തമാക്കുന്നതാണ്.
രണ്ട് കൈകളാല്‍ സമ്പാദിക്കുകയും ആയിരം കൈകളിലൂടെ വിതരണം ചെയ്യുകയും ചെയ്യുക എന്നതാണ് ഭാരതീയ മൂല്യങ്ങള്‍ പഠിപ്പിക്കുന്നത്. മഹത്തായ ഈ ഹൈന്ദവ മൂല്യങ്ങള്‍ ലോകം ഏറ്റെടുത്തു. ലോകമെമ്പാടുമുള്ള രാജ്യങ്ങള്‍ മതനിരപേക്ഷതക്കായി മുറവിളി കൂട്ടുന്നു. എന്നാല്‍ ഭാരതത്തില്‍ നൂറ്റാണ്ടുകളായി ധര്‍മ്മത്തിന്റെ പാതയില്‍ എല്ലാവരും ജീവിക്കുന്നു. സമൂഹത്തെ വേര്‍തിരിക്കുകയല്ല പകരം ലോകക്ഷേമത്തിനുള്ള ഒരു ഉപകരണമാക്കി ഒരുമിച്ച് ചേര്‍ക്കുകയാണ് സംഘം ചെയ്യുന്നതെന്നും അദ്ദേഹം പറഞ്ഞു.
പ്രതികരിക്കാൻ ഇവിടെ എഴുതുക: