ചെന്നൈ: തമിഴ്നാട്ടില് ശാന്തിഗിരി ആശ്രമത്തിന്റെ പ്രവര്ത്തനങ്ങള് 25 വര്ഷം പൂര്ത്തിയാകുന്നതിന്റെ ഭാഗമായി വിപുലമായ ആഘോഷപരിപാടികള്ക്ക് ജനു. 5 ന് തുടക്കമാകും. ചെങ്കല്പേട്ട് ജില്ലയിലെ ചെയ്യൂരില് നിര്മാണം പൂര്ത്തിയായ ദര്ശനമന്ദിരത്തിന്റെ തിരിതെളിക്കലും സില്വര് ജൂബിലി കോംപ്ലക്സിന്റെ ശിലാസ്ഥാപനവും ഏഴിന് ആശ്രമം ഗുരുസ്ഥാനീയ ശിഷ്യപൂജിത അമൃതജ്ഞാന തപസ്വിനി നിര്വഹിക്കും.
ശാന്തിഗിരി ആശ്രമത്തിന്റെ വാക്കും വഴിയുമാണ് ശിഷ്യപൂജിത. ഇത് ആദ്യമായാണ് ഗുരുസ്ഥാനീയ ചെന്നൈയില് എത്തുന്നത്. ആശ്രമം പ്രസിഡന്റ് സ്വാമി ചൈതന്യ ജ്ഞാനതപസ്വി, ജനറല് സെക്രട്ടറി സ്വാമി ഗുരുരത്നം ജ്ഞാനതപസ്വി തുടങ്ങി നൂറോളം സംന്യാസിമാരും ബ്രഹ്മചാരികളും ഭക്തരും തീര്ത്ഥയാത്രയില് ശിഷ്യപൂജിതയെ അനുഗമിക്കുന്നുണ്ട്.
ചെന്നൈ – പോണ്ടിച്ചേരി ഈസ്റ്റ് കോസ്റ്റ് റോഡില് പ്രകൃതിരമണീയമായ ചെയ്യൂരിലാണ് ആശ്രമം പ്രവര്ത്തിക്കുന്നത്. ആശ്രമത്തിലെത്തുന്ന ശിഷ്യപൂജിതയെ ജനപ്രതിനിധികളും നാട്ടുകാരും ചേര്ന്ന് പൂര്ണകുംഭം നല്കി സ്വീകരിക്കും. തുടര്ന്ന് ഗുരുപൂജ, ആരാധന, ഗുരുദര്ശനം എന്നിവ നടക്കും. വൈകിട്ട് 4 ന് നടക്കുന്ന വിളംബര സമ്മേളനം ന്യൂനപക്ഷ ക്ഷേമകാര്യ മന്ത്രി കെ.എസ്. മസ്താന് ഉദ്ഘാടനം ചെയ്യും. തിരുനാവക്കരശ് എംപി, എസ്.റ്റി. രാമചന്ദ്രന് എംഎല്എ തുടങ്ങി വിവിധ രാഷ്ട്രീയ, സാമൂഹിക, സാംസ്കാരിക മേഖലകളിലുളളവര് ചടങ്ങില് സംബന്ധിക്കും.
7 ന് രാവിലെ 9 മണിക്ക് ഗുരുവിന്റെ ധ്യാനമഠത്തിന്റെയും ദര്ശന മന്ദിരത്തിന്റെയും തിരിതെളിക്കുന്നതിനൊ
പ്പം സില്വര് ജൂബിലി സമുച്ചയത്തിന്റെ ശിലാസ്ഥാപനവും ഗുരുസ്ഥാനീയ നിര്വഹിക്കും. രാവിലെ 11 ന് നടക്കുന്ന പൊതുസമ്മേളനം മന്ത്രി മനോ തങ്കരാജ് ഉദ്ഘാടനം ചെയ്യും. മന്ത്രി ജി.ആര്. അനില് വിശിഷ്ടാതിഥിയാകും. മുന് മിസോറാം ഗവര്ണര് കുമ്മനം രാജശേഖരന്, കാഞ്ചീപുരം എം.പി ജി. സെല്വം, പനിയൂര് ബാബു എംഎല്എ, മുന് എംപി വിജില സത്യനാഥ്, എഐസിസി സെക്രട്ടറി വിശ്വനാഥന് പെരുമാള്, ഗോകുലം ഗ്രൂപ്പ് ചെയര്മാന് ഗോകുലം ഗോപാലന്, എവിഎ ഗ്രൂപ്പ് ഒഫ് കമ്പനീസ് എംഡി എ.വി. അനൂപ്, ബിജെപി ദേശീയ നിര്വാഹകസമിതി അംഗം പി.കെ. കൃഷ്ണദാസ് തുടങ്ങി നിരവധി പ്രമുഖര് ചടങ്ങുകളില് സംബന്ധിക്കും.
സില്വര് ജൂബിലി ആഘോഷങ്ങളോടനുബന്ധിച്ച് അന്നേദിവസം രാവിലെ 9 മുതല് ഉച്ചക്ക് 2 മണി വരെ തിരുവനന്തപുരം ശാന്തിഗിരി സിദ്ധ മെഡി. കോളേജിന്റെയും ചെന്നൈ നാഷണല് ഇന്സ്റ്റിറ്റിയൂട്ട് ഓഫ് സിദ്ധയുടെയും സംയുക്താഭിമുഖ്യത്തില് സൗജന്യ വൈദ്യപരിശോധനയും മരുന്നു വിതരണവും നടക്കും. വൈകുന്നേരം ദീപപ്രദക്ഷിണവും സത്സംഗവും കലാപരിപാടികളും ഉണ്ടായിരിക്കും. പ്രാര്ത്ഥനാലയം, ദര്ശനമന്ദിരം, ധ്യാനമഠം, ആയൂര്വേദ-സിദ്ധ-യോഗ വെല്നസ് സെന്റര് എന്നിവയും എഡ്യൂക്കേഷണല് കോംപ്ലക്സും ആദ്യഘട്ടത്തില് സ്ഥാപിക്കും. ദിവസവും അന്നദാനം ഉണ്ടായിരിക്കും.
നവജ്യോതിശ്രീ കരുണാകരഗുരുവിന്റെ ആശയത്തില് അധിഷ്ഠിതമായി ഓരോ പ്രദേശത്തെയും ജനങ്ങളുടെ ക്ഷേമത്തിനും ഐശ്വര്യത്തിനും വേണ്ടിയാണ് ആശ്രമം ബ്രാഞ്ചുകള് പ്രവര്ത്തിക്കുന്നതെന്നും ചെയ്യൂരിലെയും പരിസരത്തെയും ജീവകാരുണ്യവും സാമൂഹികവുമായ പ്രവര്ത്തനങ്ങള്ക്ക് ഈ ആശ്രമത്തില് നിന്ന് തുടക്കമാകുമെന്നും സ്വാമി മനുചിത്ത് ജ്ഞാനതപസ്വി, സ്വാമി ഭക്തദത്തന് ജ്ഞാനതപസ്വി, ഡോ. ജി. ആര്. കിരണ്, കെ.എസ്. പണിക്കര്, വിജയന് എസ്. എന്നിവര് വാര്ത്താസമ്മേളനത്തില് അറിയിച്ചു.
