ന്യൂദല്‍ഹി: ജമ്മുകശ്മീരില്‍ കൂടുതല്‍ സൈന്യത്തെ വിന്യസിക്കും. ഭീകരവാദഭീഷണിയുടെ പശ്ചാത്തലത്തിലാണിത്. പൂഞ്ചിലും രജൗരിയിലും ഭീകരര്‍ക്കെതിരായ നീക്കങ്ങള്‍ കൂടുതല്‍ ശക്തിപ്പെടുത്തുന്നതും മുന്നില്‍ക്കണ്ടാണ് ഈ തീരുമാനം. ജമ്മുകശ്മീരിന് പുറത്തുനിന്നും ആവശ്യമെങ്കില്‍ സൈന്യത്തെ എത്തിക്കും. ചൈന അതിര്‍ത്തിയിലെ സേനാവിന്യാസത്തെ ബാധിക്കാതെയാകുമിത്. വ്യാഴാഴ്ച സൈനിക വാഹനങ്ങള്‍ക്കുനേരെയുണ്ടായ ആക്രമണത്തിന്റെ പശ്ചാത്തലത്തില്‍ രജൗരിയിലും പൂഞ്ചിലും സേനാവിന്യാസം വര്‍ധിപ്പിച്ചിട്ടുണ്ട്. നിയന്ത്രണ രേഖയിലും നിരീക്ഷണം ശക്തമാക്കിയിട്ടുണ്ട്.
ജമ്മുകശ്മീരില്‍ സൈന്യത്തിന് നേരെ ആക്രമണം നടത്താന്‍ ഭീകരര്‍ക്ക് ചൈനീസ് നിര്‍മിത ആയുധങ്ങളും ആശയവിനിമയ ഉപകരണങ്ങളും ഉപയോഗിക്കുന്നതായി കണ്ടെത്തി. ചൈനീസ് നിര്‍മിത ആയുധങ്ങള്‍, ബോഡി സ്യൂട്ട് ക്യാമറകള്‍, വാര്‍ത്താവിനിമയ ഉപകരണങ്ങള്‍ എന്നിവ ഉപയോഗിച്ച് ഭീകരര്‍ സൈന്യത്തെ ആക്രമിക്കുന്നുണ്ടെന്നാണ് രഹസ്യാന്വേഷണ ഏജന്‍സികള്‍ കണ്ടെത്തിയിരിക്കുന്നത്. അടുത്തിടെ നടന്ന ആക്രമണങ്ങളില്‍ ഭീകരര്‍ ഇവ ഉപയോഗിച്ചിരുന്നതായും സുരക്ഷാസേന കണ്ടെത്തിയിട്ടുണ്ട്. പാകിസ്ഥാന്‍ സൈന്യത്തിന് ഡ്രോണുകളും ഹാന്‍ഡ് ഗ്രനേഡുകളും മറ്റ് ആയുധങ്ങളും ചൈന വിതരണം ചെയ്യുന്നുണ്ടെന്നും റിപ്പോര്‍ട്ടുകളുണ്ട്.
ഈ വര്‍ഷം നടന്ന മൂന്ന് ഭീകരാക്രമണങ്ങള്‍ക്കുശേഷം ഭീകരര്‍ പുറത്തുവിട്ട ചിത്രങ്ങള്‍ ചൈനീസ് നിര്‍മ്മിത ബോഡി ക്യാമറകളില്‍ നിന്ന് എടുത്തതും എഡിറ്റ് ചെയ്യുകയും മോര്‍ഫ് ചെയ്യുകയും ചെയ്തതാണെന്നാണ് കണ്ടെത്തല്‍. ആശയവിനിമയത്തിനായി ഭീകരര്‍ ഉപയോഗിക്കുന്ന ഉപകരണങ്ങളും ചൈനീസ് നിര്‍മിതമാണെന്നും രഹസ്യാന്വേഷണ ഏജന്‍സികള്‍ അറിയിച്ചു. പാകിസ്ഥാനിലെ വിരമിച്ച സൈനികരും ഭീകരപ്രവര്‍ത്തനത്തിലുണ്ടെന്ന സൂചനകളും പുറത്തുവരുന്നുണ്ട്. ചൈനയുമായി അതിര്‍ത്തി പങ്കിടുന്ന ലഡാക്കില്‍ ഭാരതസൈന്യത്തെ പിന്‍വലിക്കാന്‍ ലക്ഷ്യമിട്ടുള്ള നീക്കമായാണ് ഇതിനെ കാണുന്നത്. മറ്റുഭാഗങ്ങളില്‍ ഭീകരപ്രവര്‍ത്തനങ്ങള്‍ ശക്തമാകുമ്പോള്‍ അവിടേക്ക് സൈനികരെ വിന്യസിക്കാന്‍ ലഡാക്കില്‍ സേനാവിന്യാസം കുറയ്‌ക്കുമെന്ന കണക്കുകൂട്ടലും ചൈനയ്‌ക്കുണ്ട്.
പ്രതിരോധമന്ത്രി രാജ്നാഥ്സിങ് ഇന്ന് ജമ്മുകശ്മീര്‍ സന്ദര്‍ശിക്കുമെന്ന വാര്‍ത്തകളും പുറത്തുവരുന്നുണ്ട്. ജമ്മുകശ്മീരിലെ സുരക്ഷാസാഹചര്യം നേരിട്ട് വിലയിരുത്താനാണിത്. പൂഞ്ചിലും രജൗരിയിലും അദ്ദേഹം സന്ദര്‍ശനം നടത്തുമെന്നും റിപ്പോര്‍ട്ടുകള്‍ പുറത്തുവരുന്നുണ്ട്. കഴിഞ്ഞദിവസം ജമ്മുകശ്മീരിലെത്തിയ കരസേനാമേധാവി മനോജ് പാണ്ഡെ സുരാന്‍ കോട്ടിലും രജൗരിയിലും നടക്കുന്ന സൈനിക നീക്കങ്ങളുടെ പുരോഗതി വിലയിരുത്തിയിരുന്നു.
പ്രതികരിക്കാൻ ഇവിടെ എഴുതുക: