തിരുവനന്തപുരം: ഡിജിപിയുടെ ഔദ്യോഗിക വസതിയിലേക്ക് മഹിളാ മോര്ച്ച പ്രവര്ത്തകര് നടത്തിയ പ്രതിഷേധ മാര്ച്ചില് മാധ്യമപ്രവര്ത്തകര്ക്കെതിരെയും കേസ്. കണ്ടാലറിയാവുന്ന നാല് മാധ്യമപ്രവര്ത്തകരെ പ്രതിയാക്കിയാണ് എഫ്ഐആര്. ദൃശ്യങ്ങള് ചിത്രീകരിക്കാന് ക്യാമറയും മൊബൈലുമായെത്തിയവര്ക്കെതിരെയാണ് മ്യൂസിയം പോലീസ് കേസെടുത്തത്. അതിക്രമിച്ച് കടന്നുകയറി എന്നതിനാണ് നടപടി. ഉന്നത സമ്മര്ദ്ദത്തിന്റെ അടിസ്ഥാനത്തിലാണ് മാധ്യമപ്രവര്ത്തകര്ക്കെതിരെയുള്ള നടപടിയെന്നാണ് സൂചന.
അതേസമയം പോലീസ് നടപടിയെ മുഖ്യമന്ത്രി ന്യായീകരിച്ചു. ഗൂഢാലോചന ഗൂഢാലോചന തന്നെയാണ്. മാധ്യമപ്രവര്ത്തകര്ക്കെതിരായ കേസില് പോലീസിന് വിശ്വാസക്കുറവില്ല. പോലീസ് കേസെടുക്കുന്നത് തെളിവുകളുടെ അടിസ്ഥാനത്തിലാണ്. അങ്ങനെയല്ലെന്ന് നിങ്ങള്ക്ക് തെളിയിക്കാം. ശബ്ദമുയര്ത്തി വിരട്ടാമെന്ന് ആരും കരുതേണ്ടെന്നും മുഖ്യമന്ത്രി പറഞ്ഞു
മാധ്യമപ്രവര്ത്തകരുടെ കൂട്ടത്തില് ഗൂഢാലോചന നടത്താന് പറ്റിയവരുണ്ടെന്നും മുഖ്യമന്ത്രി കൂട്ടിച്ചേര്ത്തു. കുറുപ്പംപടിയില് നവകേരള ബസിന് നേരെ ഷൂ എറിഞ്ഞത് റിപ്പോര്ട്ട് ചെയ്ത മാധ്യമപ്രവര്ത്തകയ്ക്കെതിരെ നേരത്തെ കേസെടുത്തിരുന്നു.
