കറാച്ചി : അധോലോക കുറ്റവാളി ദാവൂദ് ഇബ്രാഹിമിനെ ഗുരുതരാവസ്ഥയില് ആശുപത്രിയില് പ്രവേശിപ്പിച്ചതായി റിപ്പോര്ട്ട്. വിഷം ഉള്ളില് ചെന്നതാണ് ഗുരുതരാവസ്ഥയ്ക്ക് കാരണമെന്നാണ് റിപ്പോര്ട്ട്. നിലവില് കറാച്ചിയിലെ ആശുപത്രിയില് ദാവൂദ് ചികിത്സയിലാണെന്നാണ് അറിയുന്നത് എന്നാല് വാര്ത്ത ഇതുവരെ സ്ഥിരീകരിക്കപ്പെട്ടിട്ടില്ല.
ആരോഗ്യ സ്ഥിതി മോശമായതിനെ തുടര്ന്ന് ദാവൂദ് രണ്ട് ദിവസമായി ആശുപത്രിയില് ആണെന്നാണ് ഏജന്സികള് റിപ്പോര്ട്ട് ചെയ്യുന്നത്. എന്നാല് തിങ്കളാഴ്ചയാണ് ഇതുസംബന്ധിച്ചുള്ളസ വാര്ത്ത പുറത്തുവന്നത്. കറാച്ചിയിലെ ആശുപത്രിയുടെ ഒരു നില ദാവൂദിന് വേണ്ടി മാത്രം നീക്കിവച്ചിരിക്കുകയാണ്. വന് സുരക്ഷയാണ് ഇവിടെസ ഒരുക്കിയിട്ടുള്ളത്. നിലവില് ആശുപത്രി ഉന്നത വൃത്തങ്ങള്ക്കും ദാവൂദിന്റെ അടുത്ത കുടുംബാംഗങ്ങള്ക്കും മാത്രമാണ് ഇവിടേക്ക് പ്രവേശനമുള്ളത്.
ഭാരതത്തില് ആക്രമണം നടത്തിയതിനും കള്ളപ്പണ ഇടപാടുകള് എന്നിവയ്ക്കുള്പ്പടെ നിരവധി കേസുകളാണ് രജിസ്റ്റര് ചെയ്തിട്ടുള്ളത്. വിവിധ ഏജന്സികള് ദാവൂദിനെതിരെ അന്വേഷണവും നടത്തുന്നുണ്ട്. അതിനിടയിലാണ് ആശുപത്രിയിലാണെന്ന വാര്ത്ത പുറത്തുവന്നിരിക്കുന്നത്. ഇതിനെ തുടര്ന്ന് ദാവൂദിനെക്കുറിച്ച് കൂടുതല് വിവരങ്ങള് ലഭിക്കാനുള്ള ശ്രമത്തിലാണ് മുംബൈ പോലീസ്. രണ്ടാം വിവാഹത്തിനു ശേഷം ദാവൂദ് കറാച്ചിയിലാണ് താമസിക്കുന്നതെന്ന് ദാവൂദിന്റെ സഹോദരിയുടെ മകന് എന്ഐഎയോട് വെളിപ്പെടുത്തിയിരുന്നു.
