വനവിഭവങ്ങൾ തേടി പോയ മദ്ധ്യവയസ്‌കനെ കടുവ കൊന്നു; മൃതദേഹം വികൃതമാക്കിയ നിലയിൽ

വയനാട്: കർണാടക ഗുണ്ടൽപേട്ടയിൽ വനവാസി മദ്ധ്യവയസ്‌കനെ കടുവ കൊലപ്പെടുത്തി. ബന്ദിപ്പൂർ ദേശീയ ഉദ്യാനത്തിലെ കണ്ടിക്കര സ്വദേശി ബസവയെയാണ് കടുവ ആക്രമിച്ചത്. 54 വയസായിരുന്നു. വനവിഭവങ്ങൾ ശേഖരിക്കുന്നതിനായി പോയ ബസവ തിരികെ എത്താത്തതിനെ തുടർന്ന് നടത്തിയ അന്വേഷണമാണ് മരണവിവരം പുറത്തറിയാൻ സഹായിച്ചത്.

വനം വകുപ്പ് ഉദ്യോഗസ്ഥർ നടത്തിയ തിരച്ചിലിൽ ബസവയുടെ മൃതദേഹാവശിഷ്ടങ്ങൾ വികൃതമായ രീതിയിൽ കണ്ടെത്തുകയായിരുന്നു. മൃതദേഹം ഭക്ഷിച്ചതും വികൃതമാക്കിയ നിലയിലുമാണ് കണ്ടെത്തിയതെന്ന് വനം വകുപ്പ് ഉദ്യോഗസ്ഥർ പറയുന്നു. പ്രദേശത്ത് ഒരു മാസത്തിനിടെ കടുവയുടെ ആക്രമണം നേരിടുന്ന മൂന്നാമത്തെ ആളാണ് ബസവ.