ലോകേഷ് കനകരാജ് ചിത്രം ലിയോയുടെ ഗംഭീര വിജയത്തിന് ശേഷം ദളപതി വിജയ്യുടെ പുതിയ ചിത്രത്തിനായി കാത്തിരിക്കുകയാണ് ആരാധകര്. തമിഴിലെ സൂപ്പര് ഡയറക്ടർ വെങ്കട്ട് പ്രഭു ഒരുക്കുന്ന ‘ദളപതി 68’ ആണ് വിജയുടെ ചിത്രീകരണം പുരോഗമിക്കുന്ന പുതിയ സിനിമ.എജിഎസ് എന്റർടൈൻമെന്റ്സ് നിര്മ്മിക്കുന്ന ചിത്രത്തിന്റെ പൂജ ചടങ്ങിന്റെ വീഡിയോ വലിയ ആവേശത്തോടെയാണ് ആരാധകര് സ്വീകരിച്ചത്. മീനാക്ഷി ചൗധരിയാണ് ചിത്രത്തിലെ നായിക.
അറ്റ്ലി സംവിധാനം ചെയ്ത ബിഗിലിന് ശേഷം വിജയ്യെ നായകനാക്കി എജിഎസ് ഒരുക്കുന്ന രണ്ടാമത്തെ ചിത്രമാണിത്. യുവൻ ശങ്കർ രാജയാണ് ദളപതി 68 ന് സംഗീതം ഒരുക്കുന്നത്.സിനിമയുടെ ഓരോ അപ്ഡേറ്റും ആഘോഷമാക്കുന്ന വിജയ് ആരാധകരെ ആവേശം കൊള്ളിക്കുന്ന ഒരു പുതിയ വിവരമാണ് കോളിവുഡില് നിന്ന് പുറത്തുവന്നിരിക്കുന്നത്
.ദളപതി 68ല് വിജയ് തന്റെ വിന്റേജ് ലുക്കിൽ എത്തുമെന്നാണ് പുറത്തുവരുന്ന ഏറ്റവും പുതിയ റിപ്പോർട്ട്. 2000 – 2005 കാലഘട്ടത്തിലുള്ള ലുക്കിലാണ് പുതിയ ചിത്രത്തിൽ വിജയ് എത്തുന്നത്.തമിഴിലെ സൂപ്പർ താര പദവിയിലേക്ക് വിജയ് നടന്നുകയറിയ അദ്ദേഹത്തിന്റെ കരിയറിലെ പീക്ക് ടൈമിലെ ലുക്കിൽ വിണ്ടും എത്തുന്നു എന്ന വാര്ത്ത പ്രേക്ഷകരെയും അമ്പരപ്പിച്ചിരിക്കുകയാണ്.
ചിത്രത്തിൽ 10 മിനിറ്റ് ദൈർഘ്യമുള്ള രംഗത്തിലാണ് വിജയ് പഴയ രൂപത്തിൽ എത്തുന്നത്. ഡി എജിങ് ടെക്നോളജി ഉപയോഗിച്ചാണ് വിജയിയെ വീണ്ടും ചെറുപ്പക്കാരനാക്കിയെതെന്നാണ് വിവരം.ഈ രംഗങ്ങളുടെ ചിത്രീകരണത്തിനായി ഏകദേശം ആറ് കോടി രൂപയോളം നിര്മ്മാതാക്കള് ചെലവഴിച്ചെന്നും വിവരമുണ്ട്. സിനിമയുടെ പ്രീ പ്രൊഡക്ഷന് ഘട്ടത്തില് 3ഡി വിഎഫ്എക്സ് സ്കാനിങ്ങിനായി താരം യുഎസില് പോയിരുന്നു.
ഹൈദരബാദിൽ പുരോഗമിക്കുന്ന ഇന്ത്യയിലെ ഷെഡ്യൂളിന് ശേഷം ഇസ്താംബൂളിൽ ആകും ബാക്കി ഭാഗങ്ങൾ ചിത്രീകരിക്കുക. പ്രശാന്ത്, പ്രഭുദേവ, സ്നേഹ, ലൈല, മോഹൻ, യോഗി ബാബു, അജ്മൽ, ജയറാം, യുഗേന്ദ്രൻ, വൈഭവ്, പ്രേംജി , അരവിന്ദ് ആകാശ് തുടങ്ങി വമ്പൻ താരനിരയാണ് ‘ദളപതി 68’ ൽ അഭിനയിക്കുന്നത്.
