പറവൂര്‍: കുസാറ്റിലെ ദുരന്തത്തില്‍ ജീവന്‍ നഷ്ടപ്പെട്ട ആന്‍ റുഫ്തയ്‌ക്ക് കുറുമ്പത്തുരുത്ത് ഗ്രാമം കണ്ണീരോടെ യാത്രാമൊഴി നല്കി. ചവിട്ട് നാടക ആശാന്‍ കുറുമ്പത്തുരുത്ത് കോണത്ത് വീട്ടില്‍ റോയ് ജോര്‍ജ് കുട്ടിയുടെയും സിന്ധുവിന്റെയും മകളാണ്. കുസാറ്റില്‍ രണ്ടാം വര്‍ഷ എന്‍ജിനീയറിങ് വിദ്യാര്‍ത്ഥിയുമായിരുന്നു.
വിദേശത്ത് ജോലിക്ക് പോയിരുന്ന അമ്മ സിന്ധു ഇന്നലെ അഞ്ച് മണിയോടെയാണ് വീട്ടില്‍ എത്തിയത്. മകളുടെ ചേതനയറ്റ മൃതദ്ദേഹം കണ്ടതോടെ വാവിട്ട് കരഞ്ഞത് വിങ്ങുന്ന ഹൃദയവേദനയോടെയാണ് ജനങ്ങള്‍ക്ക് നോക്കിനില്‍ക്കേണ്ടി വന്നത്. അച്ഛനൊപ്പം ചെറിയ കുട്ടിയായിരിക്കുമ്പോള്‍ മുതല്‍ ചവിട്ട് നാടകങ്ങളില്‍ വേഷങ്ങള്‍ അണിയുകയും പിന്നീട് മികച്ച വേഷങ്ങളിലൂടെ അരങ്ങത്ത് തിളങ്ങുകയും ചെയ്ത കുറുമ്പത്തുരുത്തിന്റെ രാജകുമാരിയെ അവസാനമായി ഒരു നോക്കുകാണാന്‍ നാടിന്റെ നാനാഭാഗത്ത് നിന്നും നിരവധി പേരാണ് കോണത്ത് വീട്ടില്‍ എത്തിയത്.
വീട്ടിലെ ശുശ്രൂഷകള്‍ക്കു ശേഷം മൃതദേഹം കുറുമ്പത്തുരുത്ത് സെ. ജോസഫ് പള്ളിയിലെത്തിച്ചു. കോട്ടപ്പുറം രൂപത വികാരി ജനറല്‍ ആന്റണി കുരിശിങ്കലിന്റെ കാര്‍മികത്വത്തില്‍ നടന്ന കുര്‍ബാനക്കും ശുശ്രൂഷകള്‍ക്കും ശേഷം അച്ഛന്‍ റോയ്, അമ്മ സിന്ധു, സഹോദരന്‍ റിഥുല്‍ എന്നിവരും ബന്ധുക്കളും അന്ത്യചുംബനം നല്കി തങ്ങളുടെ രാജകുമാരിയെ യാത്രയാക്കി.
പ്രതികരിക്കാൻ ഇവിടെ എഴുതുക: