കൊച്ചി : തിരുവനന്തപുരത്തെ കണ്ടല സഹകരണ ബാങ്ക് തട്ടിപ്പ് കേസില്‍ പ്രതിയായ സിപിഐ മുന്‍ ജില്ല കൗണ്‍സില്‍ അംഗവും മുന്‍ ബാങ്ക് പ്രസിഡന്റുമായ ഭാസുരാംഗന് വീണ്ടും ദേഹാസ്വാസ്ഥ്യം. ഭാസുരാംഗനെ കഴിഞ്ഞ ദിവസം റിമാന്‍ഡ് ചെയ്തിരുന്നു. ജയിലില്‍ വെച്ചാണ് ഭാസുരാംഗന് നെഞ്ചുവേദന അനുഭവപ്പെട്ടത്. നിലവില്‍ എറണാകുളം ജനറല്‍ ആശുപത്രിയിലാണ് ഭാസുരാംഗനെ ചികിത്സയ്‌ക്കായി പ്രവേശിപ്പിച്ചിരിക്കുന്നത്.
കഴിഞ്ഞ ദിവസം കോടതിയില്‍ ഹാജരാക്കിയപ്പോള്‍ ഭാസുരാംഗന്റെ ആരോഗ്യ പ്രശ്‌നങ്ങള്‍ കോടതിയെ അറിയിച്ചതാണ്. തുടര്‍ന്ന് പ്രതിക്ക് ശാരീരിക അവശതകള്‍ ഉണ്ടെങ്കില്‍ ജയില്‍ സൂപ്രണ്ടിനോട് ചികിത്സ ഉറപ്പാക്കാനും ആവശ്യപ്പെട്ടിരുന്നു.ആരോഗ്യ സ്ഥിതി മോശമാണെന്നും അതിനാല്‍ റിമാന്‍ഡ് ഒഴിവാക്കണമെന്നുമാണ് പ്രതിഭാഗം കോടതിയില്‍ അറിയിച്ചത്. ഇതിനെ ഇഡി എതിര്‍ത്തതോടെ ചികിത്സ ലഭ്യമാക്കാന്‍ കോടതി അറിയിക്കുകയായിരുന്നു. ഇന്ന് രാവിലെ പത്തിന് ജയിലില്‍ വെച്ചാണ് ഇയാള്‍ക്ക് നെഞ്ചുവേദനയുള്ളതായി അറിയിച്ചത്. തുടര്‍ന്ന് ജയിലിലെ ഡോക്ടര്‍ ഉള്‍പ്പടെ പരിശോധിച്ച് ഉറപ്പിച്ച ശേഷം ഇവരെ ആശുപത്രിയിലേക്ക് മാറ്റുകയായിരുന്നു.
ഇതിനിടെ, ഭാസുരാംഗന്റെ തിരുവനന്തപുരം മാറനെല്ലൂരിലെ വീട്ടില്‍ ഇഡി പരിശോധന തുടങ്ങി. ഇന്ന് ഉച്ചയോടെയാണ് വീട്ടില്‍ പരിശോധന ആരംഭിച്ചത്. നേരത്തെ പരിശോധന പൂര്‍ത്തിയാക്കി ഈ വീട് ഇഡി സീല്‍ ചെയ്തിരുന്നു. കൊച്ചിയിലെ സാമ്പത്തിക കുറ്റകൃത്യം കൈകാര്യം ചെയ്യുന്ന കോടതി ഇന്നലെയാണ് കേസില്‍ അറസ്റ്റിലായ ഭാസുരാംഗനെയും മകന്‍ അഖില്‍ ജിത്തിനെയും അടുത്തമാസം അഞ്ചുവരെ റിമാന്‍ഡ് ചെയ്തത്. പ്രതികള്‍ അന്വേഷവുമായി സഹകരിക്കുന്നില്ലെന്നാണ് ഇഡി കോടതിയെ അറിയിച്ചിരുന്നത്.
കണ്ടലയിലേത് സംഘടിത കുറ്റകൃത്യമാണെന്നും മുഴുവന്‍ നിക്ഷേപങ്ങളെ കുറിച്ചും ആസ്തികളെക്കുറിച്ചും ഭാസുരാംഗന് വെളിപ്പെടുത്തുന്നില്ല. തട്ടിപ്പില്‍ സിപിഐ മുന്‍ ജില്ലാ കൗണ്‍സില്‍ അംഗത്തിന് പങ്കുണ്ട്. തട്ടിപ്പിലൂടെ ലഭിച്ച പണം എന്ത് ചെയ്‌തെന്നറിയാന്‍ കൂടുതല്‍ രേഖകള്‍ കണ്ടെടുക്കേണ്ടതുണ്ട്. മകന്‍ അഖില്‍ജിത്തിന്റെ മൊഴിയിലാണ് പല സാമ്പത്തിക ഇടപാടുകളെ കുറിച്ചുളള വിവരങ്ങളുള്ളത് വിശദമായ അന്വേഷണം വേണമെന്നുമാണ് ഇഡി ആവശ്യപ്പെട്ടിരിക്കുന്നത്.
പ്രതികരിക്കാൻ ഇവിടെ എഴുതുക: