പറവൂര്: നവകേരള സദസിന് പണം അനുവദിച്ച തീരുമാനം വിവാദമായതിനെ തുടര്ന്ന് പറവൂര് മുന്സിപ്പാലിറ്റി റദ്ദാക്കിയെങ്കിലും സെക്രട്ടറി വഴങ്ങിയില്ല. പണം അനുവദിച്ച് അദ്ദേഹം ചെക്കില് ഒപ്പിട്ടു.
നഗരസഭയുടെ ആദ്യം തീരുമാന പ്രകാരം പണം നല്കണമെന്ന നിലപാടിലായിരുന്നു സെക്രട്ടറി. യു.ഡി എഫ് ഭരണ സമിതി എതിര്ത്തെങ്കിലും ഫലമുണ്ടായില്ല.
നവകേരള സദസിന് ഒരു ലക്ഷം രൂപ നല്കാനുള്ള തീരുമാനമാണ് ഇന്ന് ചേര്ന്ന കൗണ്സില് യോഗം റദാക്കിയത്.സര്ക്കാരിന്റെ നിര്ബന്ധിത പദ്ധതി എന്ന് തെറ്റിദ്ധരിച്ചതിനാലാണ് നേരത്തെ പണം നല്കാന് തീരുമാനിച്ചതെന്നും ഇപ്പോള് ആ തീരുമാനം റദ്ദാക്കുകയാണെന്നും ചെയര്പേഴ്സന് ബീന ശശിധരന് കൗണ്സില് യോഗത്തില് അറിയിച്ചു.
ചെയര്പേഴ്സന്റെ പ്രഖ്യാപനം പ്രതിപക്ഷത്തിന്റെ എതിര്പ്പിനിടെയായിരുന്നു. നേരത്തെയെടുത്ത കൗണ്സില് തീരുമാനം റദ്ദാക്കാനാവില്ലെന്ന് സെക്രട്ടറി ജോ ഡേവിഡ് അറിയിച്ചെങ്കിലും വോട്ടെടുപ്പിലൂടെ ഭൂരിപക്ഷമനുസരിച്ചുളള തീരുമാനമാണെന്നും ഇത് ലംഘിച്ച് പണം നല്കിയാല് സെക്രട്ടറി കയ്യില് നിന്ന് നല്കേണ്ടി വരുമെന്നും ചെയര്പേഴ്സന് മുന്നറിയിപ്പ് നല്കി.
പ്രതിപക്ഷ നേതാവ് വി ഡി സതീശന്റെ മണ്ഡലത്തില് കോണ്ഗ്രസ് ഭരിക്കുന്ന മുനിസിപ്പാലിറ്റി നവകേരള സദസിന് പണം അനുവദിച്ചത് വിവാദമായിരുന്നു. മുന്നണി തീരുമാനത്തിന് എതിരായി പണം നല്കിയാല് നടപടിയുണ്ടാവുമെന്ന് പ്രതിപക്ഷ നേതാവും മുന്നറിയിപ്പ് നല്കിയിരുന്നു.
