കൊച്ചി : മുഖ്യമന്ത്രി പിണറായി വിജയനും മന്ത്രിമാരും പങ്കെടുക്കുന്ന നവകേരള സദസ്സിന്റെ ചെലവിലേക്കായി പറവൂര് നഗരസഭ നല്കാന് ഉദ്ദേശിച്ച പണം ഇനി നല്കില്ല. പ്രതിപക്ഷ നേതാവ് വി.ഡി. സതീശന്റെ മണ്ഡലവും യുഡിഎഫ് ഭരിക്കുന്ന നഗരസഭയായിട്ടും നവകേരള സഭയ്ക്കായി പണം നല്കാന് തീരുമാനിച്ചത് ഏറെ വിവാദമായിരുന്നു. യുഡിഎഫും എതിര്പ്പ് അറിയിച്ചതോടെയാണ് പണം നല്കാനുള്ള തീരുമാനം തിരുത്തിയതായി പറവൂര് നഗരസഭ അറിയിച്ചത്.
നവകേരള സദസിന് പണം നല്കേണ്ടതില്ലെന്ന് സെക്രട്ടറിക്ക് നിര്ദേശം നല്കിയതായി പറവൂര് നഗരസഭ ചെയര്പേഴ്സണ് ബീന ശശിധരന് അറിയിച്ചു. തുക നല്കാന് പതിമൂന്നിന് ചേര്ന്ന കൗണ്സില് അംഗീകാരം നല്കിയിരുന്നതാണ്. പദ്ധതി റിവിഷനുള്ള പട്ടികയില് ഉള്പ്പെടുത്തിയാണ് തുക പാസാക്കിയത്. തീരുമാനം അംഗീകാരത്തിനായി നഗരസഭ സെക്രട്ടറി ജില്ലാ ആസൂത്രണ സമിതിക്ക് കൈമാറിയിരുന്നു. ഒരു ലക്ഷം രൂപയാണ് നല്കാനിരുന്നത്. എന്നാല് തെറ്റിദ്ധാരണയ്ക്ക് പുറത്താണ് തുക വകയിരുത്തിയത്. അടുത്ത ദിവസം ചേരുന്ന കൗണ്സില് യോഗത്തില് ഇത് തിരുത്തുമെന്നും ചെയര്പേഴ്സണ് ബീന ശശിധരന് അറിയിച്ചു.
പറവൂര് നഗരസഭയെ കൂടാതെ യുഡിഎഫ് ഭരിക്കുന്ന തിരുവല്ല നഗരസഭയും കോന്നി ബ്ലോക്ക് പഞ്ചായത്തുമാണ് നവകേരള സദസ്സിന് പണം നല്കാന് തീരുമാനിച്ചിട്ടുണ്ട്. ഇതിന്റെ ഭാഗമായി തിരുവല്ല നഗരസഭ ആദ്യഘട്ടമെന്ന വിധത്തില് 50000 രൂപ നല്കി. കോന്നി ബ്ലോക്ക് പഞ്ചായത്ത് ഭരണസമിതി യോഗവും പണം നല്കാന് തീരുമാനിച്ചിട്ടുണ്ട്.
തദ്ദേശ സ്ഥാപനങ്ങള് നവകേരള സദസ്സിന് പണം നല്കണമെന്നാവശ്യപ്പെട്ട് നേരത്തെ അഡീഷണല് ചീഫ് സെക്രട്ടറി ഉത്തരവിറക്കിയിരുന്നു. പണം നല്കേണ്ടന്നാണ് കോണ്ഗ്രസ് അണികള്ക്ക് നല്കിയിട്ടുള്ള നിര്ദ്ദേശം. യുഡിഎഫ് ഭരണത്തിലുള്ള തദ്ദേശ സ്വയം ഭരണ സ്ഥാപനങ്ങള് പണം നല്കരുതെന്നും പാര്ട്ടി നിര്ദേശം നല്കിയിരുന്നു. ഈ നിര്ദേശം മറികടന്നാണിപ്പോള് തിരുവല്ല നഗരസഭയും കോന്നി ബ്ലോക്ക് പഞ്ചായത്തും പണം നല്കാന് തീരുമാനിച്ചിരിക്കുന്നത്. നേരത്തെ യുഡിഎഫ് ഭരിക്കുന്ന കണ്ണൂര് ശ്രീകണ്ഠാപുരം നഗരസഭ നവകേരള സദസ്സിന് അരലക്ഷം രൂപ അനുവദിച്ചെങ്കിലും വിവാദായതോടെ തീരുമാനം പിന്വലിച്ചു.
