തിരുവനന്തപുരം: രാജ്യത്തെ സ്‌കൂളുകളുടെ വികസനത്തിന്റെ ഭാഗമായി കേന്ദ്രസർക്കാർ നടപ്പിലാക്കിയ പ്രധാനമന്ത്രി സ്‌കൂൾസ് ഫോർ റെയ്‌സിംഗ് ഇന്ത്യ (പിഎം ശ്രീ) പദ്ധതിയുടെ ഭാഗമായി കേന്ദ്രീയ വിദ്യാലയങ്ങളിലും ജവഹർ നവോദയ വിദ്യാലയങ്ങളിലും സെൽഫി കോർണർ. ഇതിനോടനുബന്ധിച്ച് രക്ഷിതാക്കൾക്കും പൊതുജനങ്ങൾക്കും പ്രധാനമന്ത്രിയുടെ വലിയ ഫോട്ടോ വെച്ചുകൊണ്ടുള്ള സെൽഫി കോർണറിലെത്തി ചിത്രമെടുത്ത് സമൂഹമാദ്ധ്യമങ്ങളിൽ പങ്കുവെക്കാം.
സംസ്ഥാനത്തെ 41 കേന്ദ്രീയ വിദ്യാലയങ്ങളിൽ 32 എണ്ണവും പിഎം ശ്രീ കേന്ദ്രീയ വിദ്യാലയം പദ്ധതിയിൽ തിരഞ്ഞെടുക്കപ്പെട്ടതായി കേന്ദ്രീയ വിദ്യാലയ സംഘാടകൻ പറഞ്ഞു. സ്‌കൂളുകൾ പിഎം-ശ്രീ കേന്ദ്രീയ വിദ്യാലയ പദ്ധതിയിൽ തിരഞ്ഞെടുക്കപ്പെട്ടതാണെന്ന് വിദ്യാർത്ഥികളെയും രക്ഷിതാക്കളെയും പൊതുജനങ്ങളെയും ബോധവാന്മാരാക്കുന്നതിന് വേണ്ടിയാണ് സെൽഫി കോർണറിന് സമാനമായ പ്രചാരണ പദ്ധതികൾ.
വരും വർഷം സംസ്ഥാനത്തെ ബാക്കി കേന്ദ്രീയ വിദ്യാലയങ്ങൾ കൂടി പദ്ധതിയുടെ ഭാഗമാകും. 2022 സെപ്റ്റംബർ അഞ്ചിന് പ്രധാനമന്ത്രി ഉദ്ഘാടനം നിർവഹിച്ച പദ്ധതി ഈ വർഷമാണ് പ്രവർത്തനം ആരംഭിച്ചത്. ഇതിൽ തിരഞ്ഞെടുക്കപ്പെടുകയാണെങ്കിൽ സ്‌കൂൾ വികസിപ്പിക്കുന്നതിനായി ഒരു കോടി സഹായധനം ലഭിക്കും. ആദ്യ ഘട്ടം 25 ശതമാനം മാത്രമാകും പലിശ ലഭിക്കുക. തുടർന്നുള്ള നാല് വർഷം ബാക്കി തുക ലഭിക്കും.
പ്രതികരിക്കാൻ ഇവിടെ എഴുതുക: