പത്തനംതിട്ട: ചിത്തിര ആട്ടവിശേഷ പൂജകള്ക്കായി ശബരിമല ശ്രീധര്മ്മശാസ്താ ക്ഷേത്രനട തുറന്നു. ഇന്നാണ് ചിത്തിര ആട്ടവിശേഷം.
പൂജകള് പൂര്ത്തിയാക്കി ഇന്ന് രാത്രി 10 മണിക്ക് നട അടയ്ക്കും. മണ്ഡല-മകരവിളക്ക് ഉല്സവത്തിനായി 16 ന് വൈകുന്നേരം 5 മണിക്ക് വീണ്ടും നട തുറക്കും. അന്ന് പുതിയ ശബരിമല, മാളികപ്പുറം മേല്ശാന്തിമാരുടെ അവരോധന ചടങ്ങുകള് നടക്കും. തന്ത്രി കണ്ഠര് മഹേഷ് മോഹനരുടെ മുഖ്യകാര്മ്മികത്വത്തിലാണ് കലശാഭിഷേക ചടങ്ങുകള് നടക്കുക. 17 ന് വൃശ്ചികപ്പുലരിയില് അയ്യപ്പന്റെയും മാളികപ്പുറത്തമ്മയുടെയും തിരുനടകള് തുറക്കുന്നത് പുതിയ മേല്ശാന്തിമാരായിരിക്കും. ഡിസം. 26ന് തങ്ക അങ്കി ചാര്ത്തിയുള്ള ദീപാരാധനയും 27ന് മണ്ഡലപൂജയും നടക്കും. അന്ന് രാത്രി ഹരിവരാസനം പാടി അടയ്ക്കുന്ന നട മകരവിളക്ക് ഉല്സവത്തിനായി 30ന് വൈകുന്നേരം വീണ്ടും തുറക്കും. ജനുവരി 15ന് ആണ് മകരവിളക്ക്. 19ന് രാവിലെ നട അടയ്ക്കുന്നതോടെ ഒരു തീര്ത്ഥാടന കാലത്തിന് പരിസമാപ്തിയാകും.
