കൊച്ചി: സംസ്ഥാനത്തെ രണ്ട് വിമാനത്താവളങ്ങള് വഴിയുള്ള സ്വര്ണക്കടത്തിന് കൂട്ടുനിന്ന മൂന്നു കസ്റ്റംസ് ഉദ്യോഗസ്ഥരെ സര്വീസില്നിന്ന് പിരിച്ചുവിട്ടത് അപൂര്വ നടപടി. ദല്ഹി സ്വദേശികളായ രോഹിത്കുമാര് ശര്മ, കൃഷന്കുമാര്, ബിഹാര് സ്വദേശി സാകേന്ദ്ര പാസ്വാന് എന്നിവരെയാണ് പിരിച്ചുവിട്ടത്. വളരെ അപൂര്വമായാണ് കസ്റ്റംസില് നിന്ന് ഇത്തരത്തില് ജീവനക്കാരെ പിരിച്ചുവിടുന്നത്.
നേരത്തെയും രോഹിത്കുമാര് ശര്മ ഉള്പ്പടെയുള്ളവര്ക്കെതിരെ സ്വര്ണക്കടത്തിന് നടപടിയെടുത്തിരുന്നു. ഇവരെ പിരിച്ചുവിട്ടെങ്കിലും തിരിച്ചെടുക്കുകയായിരുന്നു. എന്നാല് ഇവര്ക്കെതിരെ രണ്ടാമത് നടത്തിയ അന്വേഷണത്തിലും കുറ്റക്കാരെന്ന് കണ്ടെത്തിയതോടെയാണ് ഇപ്പോള് പിരിച്ചുവിടല് നടപടി എടുത്തത്. ഇപ്പോള് നടപടി നേരിട്ട മൂന്നുപേരെയും കള്ളക്കടത്തുകാരുമായി ബന്ധപ്പെടുത്തിയ കസ്റ്റംസ് ഉദ്യോഗസ്ഥന് ദല്ഹി സ്വദേശി രാഹുല് പണ്ഡിറ്റിനെ മൂന്നു വര്ഷം മുമ്പ് പുറത്താക്കിയിരുന്നു.
പ്രധാനമായും കരിപ്പൂര്, കണ്ണൂര് വിമാനത്താവളങ്ങള് കേന്ദ്രീകരിച്ചാണ് രോഹിത് കുമാര് ശര്മയും കൃഷന് കുമാറും സാകേന്ദ്ര പാസ്വാനും ജോലി ചെയ്തിരുന്നത്. ഡയറക്ടറേറ്റ് ഓഫ് റവന്യൂ ഇന്റലിജന്സ് (ഡിആര്ഐ) 2019 ആഗസ്ത് 19ന് കണ്ണൂര് വിമാനത്താവളത്തില് നിന്ന് 4.5 കിലോഗ്രാം സ്വര്ണം പിടിച്ചിരുന്നു. ഇതിനു സഹായിച്ചെന്ന് വ്യക്തമായതിനെത്തുടര്ന്ന് ഇവര് അറസ്റ്റിലായിരുന്നു. കസ്റ്റംസ് പ്രിവന്റീവ് കമ്മിഷണറായിരുന്ന സുമിത്കുമാര് അന്ന് ഇവരെ പിരിച്ചുവിടുകയും ഒരുകോടി രൂപ പിഴ ചുമത്തുകയും ചെയ്തിരുന്നു. ഇതിനെതിരെ പ്രതികള് അപ്പീല് നല്കി. വാദം കേട്ടശേഷം സര്വീസില് തിരിച്ചെടുക്കാനും പുനരന്വേഷണത്തിനും ഉത്തരവിടുകയായിരുന്നു.
എന്നാല് പുനരന്വേഷണത്തില് മൂന്നുപേരും കുറ്റക്കാരാണെന്ന് കണ്ടെത്തിയതിനെ തുടര്ന്നാണ് പിരിച്ചുവിടല്.
