ഫ്രാങ്ക്ഫര്‍ട്ട്: ഭാര്യയുമായി വഴക്കിട്ട് നാലു വയസ്സുകാരി മകളുമായി വിമാനത്താവളം ‘ബന്ദി’യാക്കി യുവാവിന്റെ സാഹസത്തെ തുടര്‍ന്ന് ജര്‍മനിയിലെ ഹാംബുര്‍ഗ് വിമാനത്താവളം 18 മണിക്കൂര്‍ അടച്ചിട്ടു. അനുനയ ശ്രമത്തിനൊടുവില്‍ യുവാവ് കീഴടങ്ങിയതോടെയാണ് വിമാനത്താവളം തുറന്നു പ്രവര്‍ത്തിക്കാനായത്. കുഞ്ഞിനു കുഴപ്പമൊന്നുമില്ലെന്ന് അധികൃതര്‍ അറിയിച്ചു.
കുഞ്ഞിനെ വിട്ടുകിട്ടുന്നതിനായി ഭാര്യയുമായി വഴക്കിട്ട മുപ്പത്തഞ്ചുകാരന്‍ ശനിയാഴ്ച രാത്രി എട്ടിന് കുഞ്ഞുമായി കാറില്‍ വിമാനത്താവളത്തിന്റെ സുരക്ഷാവേലി കടന്ന് ഒരു തുര്‍ക്കി എയര്‍ലൈന്‍സ് വിമാനത്തിനു സമീപം നിലയുറപ്പിച്ചതിനെ തുടര്‍ന്നാണു വിമാനത്താവളം അടയ്‌ക്കേണ്ടിവന്നത്. വിമാനത്താവളത്തിലേക്ക് ഇയാള്‍ പ്രവേശിച്ചപ്പോള്‍ രണ്ടു തവണ വെടിവയ്‌ക്കുകയും പെട്രോള്‍ ബോംബ് എറിയുകയും ചെയ്തു. കുഞ്ഞിന്റെ സുരക്ഷയെക്കരുതി അതീവ ജാഗ്രതയോടെ അധികൃതര്‍ നീങ്ങിയതോടെ 17 വിമാനങ്ങള്‍ വഴിതിരിച്ചുവിട്ടു. ഇന്നലെ വൈകിട്ടു വരെയുള്ള എല്ലാ വിമാന സര്‍വീസുകളും നിര്‍ത്തിവച്ചു. 286 സര്‍വീസുകള്‍ മുടങ്ങിയതായി വിമാനത്താവള അധികൃതര്‍ അറിയിച്ചു.
പ്രതികരിക്കാൻ ഇവിടെ എഴുതുക: