പാലക്കാട്: മണ്ണാര്‍ക്കാട് കോട്ടോപ്പാടത്ത് ക്ലാസ് മുറിയിൽ തെരുവുനായ ആക്രമണം. കല്ലടി അബ്ദുഹാജി ഹൈസ്‌ക്കൂളില്‍ ആറാം ക്ലാസ് വിദ്യാർത്ഥിനി മിസ് റയ്‌ക്ക് നായയുടെ കടിയേറ്റു. കുട്ടിയെ ആശുപത്രിയിലേക്ക് മാറ്റി. നിലവിൽ കുട്ടിയുടെ ആരോഗ്യനില തൃപ്തികരമാണെന്നാണ് വിവരം. ഒരു അധ്യാപകനും കടിയേറ്റു. അധ്യാപകരുടെ സമയോചിതമായ ഇടപെടലിലൂടെ കൂടുതല്‍ വിദ്യാര്‍ത്ഥികള്‍ കടിയേല്‍ക്കാതെ രക്ഷപ്പെട്ടു.
കോട്ടോപാടത്തെ സ്കൂളിൽ രാവിലെ പത്തരയ്‌ക്കാണ് സംഭവം. ക്ലാസ് നടക്കുന്നതിനിടെ അകത്തേയ്‌ക്ക് പാഞ്ഞുവന്ന നായ കുട്ടിയെ കടിക്കുകയായിരുന്നു. ഉടനെ ക്ലാസിലുണ്ടായിരുന്ന ടീച്ചർ നായയെ ഓടിച്ച ശേഷം കുട്ടിയെ ഇവിടെ നിന്നും മാറ്റുകയായിരുന്നു. മറ്റൊരു ഇതര സംസ്ഥാന തൊഴിലാളിക്കും കടിയേറ്റിട്ടുണ്ട്. സ്കൂളിലെ മറ്റൊരു കുട്ടിക്കും കഴിഞ്ഞ ദിവസം സ്കൂളിന് പുറത്ത് നിന്ന് കടിയേറ്റിരുന്നു. സ്കൂൾ അധികൃതർ ജില്ലാ വിദ്യാഭ്യാസ ഓഫീസർക്ക് പരാതി നൽകി.
പതിവായി നായ ശല്യമുള്ള പ്രദേശമാണിതെന്നാണ് വിവരം. അടച്ചിട്ടിരുന്ന ക്ലാസ് മുറിയുടെ വാതിൽ തള്ളിത്തുറന്നാണ് നായ കയറിവന്നതെന്ന് കുട്ടിയുടെ അച്ഛൻ പ്രതികരിച്ചു.
പ്രതികരിക്കാൻ ഇവിടെ എഴുതുക