ജയ്പൂര്: മാനം കാക്കാന് പൊരുതി വീണ നൂറ് കണക്കിന് ധീരവനിതകളുടെ നാടാണ് രാജസ്ഥാനെന്നും ആ നാടിനെയാണ് കോണ്ഗ്രസ് സ്ത്രീപീഡകരുടെ അഴിഞ്ഞാട്ടത്തിന് വിട്ടുകൊടുത്തതെന്നും ബിജെപി നേതാവ് വസുന്ധര രാജെ സിന്ധ്യ. പ്രിയങ്കയും രാഹുലും രാജസ്ഥാനില് വോട്ട് ചോദിച്ച് വരുന്നതിന് മുമ്പ് ഇന്നാട്ടിലെ സ്ത്രീകളോട് മാപ്പ് പറയണമെന്നും വസുന്ധര ആവശ്യപ്പെട്ടു.
എന്താണ് രാജസ്ഥാനില് കഴിഞ്ഞ അഞ്ച് വര്ഷം നടന്നതെന്ന് ഏറ്റ് പറയണം. രാജസ്ഥാനിലെ സ്ത്രീകളെക്കുറിച്ച് പറയാതൈ മണിപ്പൂരിലേക്ക് നോക്കുന്നതെന്തിനെന്ന് നിയമസഭയില് ചോദിച്ചത് അവരുടെ തന്നെ ഒരു എംഎല്എ ആണ്. ഇതൊന്നും പ്രിയങ്കയ്ക്ക് അറിയുന്നുണ്ടാവില്ല. സീസണല് രാഷ്ട്രീയത്തിനിറങ്ങുന്ന ഫാമിലിയാണത്, വസുന്ധര രാജെ മാധ്യമപ്രവര്ത്തകരോട് പറഞ്ഞു.
സ്ത്രീകളുടെയും പെണ്കുട്ടികളുടെയും ക്ഷേമത്തിനായി എത്ര പദ്ധതികളാണ് കേന്ദ്രസര്ക്കാര് പ്രഖ്യാപിച്ചത്. എന്തുകൊണ്ടാണ് രാജസ്ഥാനിലെ നിങ്ങളുടെ സര്ക്കാര് അത് നടപ്പാക്കാതിരുന്നത്. കേന്ദ്രപദ്ധതികളുടെ ഉദ്ഘാടനച്ചടങ്ങില് ഇടം കിട്ടിയില്ലെങ്കില് നിങ്ങളുടെ മുഖ്യമന്ത്രി ഗെഹ്ലോട്ടിന് കരച്ചിലാണ്. അദ്ദേഹത്തിന് കസേര മാത്രമാണ് താത്പര്യം. ജനങ്ങളുടെ ഒരു വിഷയത്തിലും മുഖ്യമന്ത്രി ഇടപെടാറില്ല, ബിജെപി നേതാവ് ചൂണ്ടിക്കാട്ടി.
തെരഞ്ഞെടുപ്പിന് മുമ്പ് കോണ്ഗ്രസ് ജനങ്ങള്ക്ക് നിരവധി വാഗ്ദാനങ്ങള് നല്കുക പതിവാണ്. ഒന്നുപോലും അവര്ക്ക് പിന്നെ ഓര്മ്മയുണ്ടാവില്ല, വസുന്ധര രാജെ. അഞ്ച് വര്ഷം അധികാരത്തിലിരുന്നിട്ടും കോണ്ഗ്രസ് സര്ക്കാര് കാര്ഷിക കടങ്ങള് എഴുതിത്തള്ളിയില്ല. സ്ത്രീകള്ക്ക് അവരെ ഭയമാണ്. കര്ഷകര്ക്ക് അവരോട് വെറുപ്പാണ്, വസുന്ധര രാജെ പറഞ്ഞു.
