തേജസ് സ്ത്രീ ശക്തിയെ കുറിച്ചുള്ള സിനിമ; പ്രത്യേക പ്രദർശനം കണ്ട് ഉത്തർപ്രദേശ് മുഖ്യമന്ത്രി

നിശ്ചയദാർഢ്യത്തിന്റെ ആൾരൂപമായ സ്ത്രീയുടെ ജീവിതം പറയുന്ന സിനിമയായ  തേജസിന്റെ പ്രത്യേക പ്രദർശനം കണ്ട് ഉത്തർപ്രദേശ് മുഖ്യമന്ത്രി യോഗി ആദിത്യനാഥ്. ലക്‌നൗവിലെ ലോക്ഭവൻ ഓഡിറ്റോറിയത്തിലായിരുന്നു പ്രത്യേക പ്രദർശനം നടത്തിയത്. ഏറെ വികാരാതീനനായാണ് അദ്ദേഹം ചിത്രം കണ്ട് ഇറങ്ങിയത്.

ഇത് സ്ത്രീ ശാക്തീകരണത്തിന്റെ ചിത്രമല്ല, മറിച്ച് സ്ത്രീശക്തിയെ കുറിച്ചുള്ള സിനിമയാണിതെന്ന് പ്രദർശനം കണ്ട ശേഷം യോഗി ആദിത്യനാഥ് പറഞ്ഞു. തേജസിന്റെ പ്രത്യേക പ്രദർശനത്തിന്റെ ചിത്രങ്ങൾ കങ്കണ ഇൻസ്റ്റഗ്രാമിൽ പങ്കുവെച്ചു. ചിത്രം കാണുമ്പോൾ യോഗി ആദിത്യനാഥിന് കണ്ണീർ അടക്കാൻ കഴിഞ്ഞില്ലെന്ന് താരം കുറിപ്പിൽ കുറിച്ചു.

നേരത്തെ പ്രതിരോധമന്ത്രി രാജ്‌നാഥ് സിംഗിനും ഇന്ത്യൻ വ്യോമസേനയിലെ ഉദ്യോഗസ്ഥർക്കുമായി തേജസിന്റെ പ്രത്യേക പ്രദർശനം സംഘടിപ്പിച്ചിരുന്നു. എയർഫോഴ്സ് പൈലറ്റായ തേജസ് ഗില്ലിന്റെ അസാധാരണമായ ജീവിതത്തെ കുറിച്ചുള്ള സിനിമ  ഓരോ ഭാരതീയനെയും അഭിമാനം കൊള്ളിക്കുന്നു.  ഒക്ടോബർ 27-നാണ് ചിത്രം റിലീസ് ചെയ്തത്.