കോട്ടയം: അയ്മനം കരിമഠത്തിൽ സര്വീസ് ബോട്ട് വള്ളത്തിലിടിച്ചുണ്ടായ അപകടത്തിൽ മരിച്ച അനശ്വരയുടെ വീട്ടിലെത്തിയ മന്ത്രി വാസവന് നേരെ നാട്ടുകാരുടെ പ്രതിഷേധം. മേഖലയിലെ യാത്രാക്ലേശങ്ങൾ ഉയർത്തിയായിരുന്നു നാട്ടുകാരുടെ രോഷ പ്രതിഷേധം. ആളുകൾക്ക് സുഗമമായി സഞ്ചരിക്കാൻ വഴിയില്ലാത്തതാണ് കുട്ടിയുടെ മരണത്തിനിടയാക്കിയതെന്ന് നാട്ടുകാർ ആരോപിച്ചു.
ജലഗതാഗതത്തെ മാത്രം ആശ്രയിച്ചാണ് പ്രദേശവാസികൾ ഇവിടെ നിന്നും പുറത്തേയ്ക്ക് പോകുന്നത്. തിങ്കളാഴ്ചയാണ് സർവീസ് ബോട്ട് വള്ളത്തിലിടിച്ച് അപകടമുണ്ടായത്. വാഴപ്പറമ്പിൽ രതീഷ്-രേഷ്മ ദമ്പതികളുടെ മകൾ അനശ്വരയാണ് മരിച്ചത്. ഇന്ന് രാവിലെയാണ് മന്ത്രി കുട്ടിയുടെ വീട്ടിലെത്തിയത്. നാട്ടുകാരുടെ പ്രതിഷേധത്തെ തുടർന്ന് മേഖലയിലെ വഴി പ്രശ്നത്തിന് പരിഹാരം കാണാമെന്ന് ഉറപ്പ് നൽകിയ ശേഷമാണ് മന്ത്രി മടങ്ങിയത്.
ഏഴാം ക്ലാസ് വിദ്യാർഥിനിയാണ് അനശ്വര. അപകടമുണ്ടായ സ്ഥലത്തിന് സമീപത്ത് നിന്നാണ് കുട്ടിയുടെ മൃതദേഹം കണ്ടെത്തിയത്. വീട്ടിൽ നിന്നും ബോട്ട് ജെട്ടിയിലേക്ക് വള്ളത്തിൽ വരുമ്പോൾ സർവിസ് ബോട്ട് വള്ളത്തിൽ ഇടിച്ചാണ് അപകടമുണ്ടായത്. കരിമഠം പെണ്ണാർത്തോട് കോലടിച്ചിറ ബോട്ട് ജെട്ടിക്ക് സമീപമായിരുന്നു അപകടം.
അപകടത്തിൽ നിന്ന് അമ്മയെയും സഹോദരിയെയും രക്ഷപ്പെടുത്തിയിരുന്നു.
