പറവൂര്‍: തന്ത്രവിദ്യാപീഠത്തിലെ മുഖ്യാചാര്യനായിരുന്ന കല്‍പ്പുഴ ദിവാകരന്‍ നമ്പൂതിരിപ്പാടിന്റെ 110-ാമത് ജന്മദിനം പ്രമാണിച്ച് 26, 27 തീയതികളില്‍ പൂര്‍വ വിദ്യാര്‍ഥി സംഗമവും അനുസ്മരണ സമ്മേളനവും നടത്തും. 26ന് ഉച്ചക്ക് 2ന് പൂര്‍വ വിദ്യാര്‍ഥി സംഗമം ഗുരുവായൂര്‍ തന്ത്രി ഡോ. ചേന്നാസ് ദിനേശന്‍ നമ്പൂതിരിപ്പാട് ഉദ്ഘാടനം ചെയ്യും.
സമിതി പ്രസിഡന്റ് കല്‍പ്പുഴ കൃഷ്ണന്‍ നമ്പൂതിരിപ്പാട് അധ്യക്ഷനാകും. അഖിലകേരള തന്ത്രിസമാജം മേഖലാ പ്രസിഡന്റ് സി.പി. നാരായണന്‍ നമ്പൂതിരിപ്പാട് ഗുരുവന്ദനം നടത്തും. പൂര്‍വ വിദ്യാര്‍ഥികളെ ചടങ്ങില്‍ ആദരിക്കും. വിദ്യാപീഠം കുലപതി മണ്ണാറശ്ശാല സുബ്രഹ്മണ്യന്‍ നമ്പൂതിരി, പ്രിന്‍സിപ്പല്‍ ബാലകൃഷ്ണ ഭട്ട് എന്നിവര്‍ പ്രസംഗിക്കും.
തുടര്‍ന്നു നടക്കുന്ന തന്ത്രശാസ്ത്ര വിദ്വല്‍ സദസില്‍ മുല്ലപ്പളളി കൃഷ്ണന്‍ നമ്പൂതിരി പ്രബന്ധം അവതരിപ്പിക്കും. പഴങ്ങാംപറമ്പ് ഉണ്ണികൃഷ്ണന്‍ നമ്പൂതിരി, എടക്കാട് വാസുദേവന്‍ നമ്പൂതിരി, ശ്രീനിവാസന്‍ പോറ്റി എന്നിവര്‍ സംസാരിക്കും.
കല്‍പ്പുഴ ദിവാകരന്‍ നമ്പൂതിരിപ്പാടിന്റെ ജന്മദിനമായ 27ന് രാവിലെ പ്രിന്‍സിപ്പല്‍ ബാലകൃഷ്ണ ഭട്ടിന്റെ നേതൃത്വത്തില്‍ നടക്കുന്ന മഹാഗണപതിഹോമത്തോടെ ചടങ്ങുകള്‍ ആരംഭിക്കും.
തുടര്‍ന്നു നടക്കുന്ന ഗുരുപൂജയ്‌ക്ക് കുലപതി മണ്ണാറശാല സുബ്രഹ്മണ്യന്‍ നമ്പൂതിരി മുഖ്യകാര്‍മ്മികത്വം വഹിക്കും. 8 മണിക്ക് പേരാമംഗലൂര്‍ സഹോദരന്മാരായ യദു, നാരായണന്‍ എന്നിവര്‍ നയിക്കുന്ന കഥകളിപ്പദ കച്ചേരിക്കു ശേഷം ചേരുന്ന അനുസ്മരണ സമ്മേളനം നടന്‍ ദേവന്‍ ഉദ്ഘാടനം ചെയ്യും. തിരുവനന്തപുരം പുഷ്പാഞ്ജലി സ്വാമിയാര്‍ ശ്രീമദ് അച്യുതഭാരതി സ്വാമികള്‍ അനുഗ്രഹഭാഷണവും കെ.പി.സി. വിഷ്ണുഭട്ടതിരിപ്പാട് അനുസ്മരണ ഭാഷണവും നടത്തും.
തന്ത്ര വിദ്യാപീഠം പൂര്‍വ വിദ്യാര്‍ഥി കൂടിയായ നിയുക്ത ശബരിമല മേല്‍ശാന്തി പി.എന്‍. മഹേഷ് നമ്പൂതിരിയെ ചടങ്ങില്‍ ആദരിക്കും.
താന്ത്രികാചാര്യന്മാരായ കല്‍പ്പുഴ ദിവാകരന്‍ നമ്പൂതിരിപ്പാട് വേഴപ്പറമ്പ് പരമേശ്വരന്‍ നമ്പൂതിരിപ്പാട്, കെ.പി.സി. നാരായണന്‍ ഭട്ടതിരിപ്പാട് എന്നിവരുടെ സ്മരണാര്‍ത്ഥം നല്കുന്ന ആചാര്യ പുരസ്‌കാരങ്ങള്‍ യഥാക്രമം കടിയക്കോല്‍ കൃഷ്ണന്‍ നമ്പൂതിരി (തന്ത്രശാസ്ത്രം), നീലമന മാധവന്‍ നമ്പൂതിരി (യജുര്‍വേദം), കല്ലേക്കുളങ്ങര അച്യുതന്‍കുട്ടി മാരാര്‍ (ക്ഷേത്രവാദ്യം) എന്നിവര്‍ക്ക് സമര്‍പ്പിക്കും.
കഴിഞ്ഞവര്‍ഷം തന്ത്രപഠനം പൂര്‍ത്തിയാക്കിയവര്‍ക്കുള്ള സര്‍ട്ടിഫിക്കറ്റുകളും ചടങ്ങില്‍ വിതരണം ചെയ്യും. ആമേടമംഗലം വാസുദേവന്‍ നമ്പൂതിരി, മുല്ലപ്പള്ളി കൃഷ്ണന്‍ നമ്പൂതിരി, ടി.എം.എസ്. പ്രമോദ് എന്നിവര്‍ സംബന്ധിക്കും.
പ്രതികരിക്കാൻ ഇവിടെ എഴുതുക: