കുന്നംകുളം: കോതമംഗലം മാര്ബേസില് എച്ച്എസ്എസിലെ എംലിന് അന്ന പോള് നല്ലൊരു ഫുട്ബോള് താരം മാത്രമല്ല മികച്ച ഏറുകാരിയാണെന്നുകൂടി ഇന്നലെ തെളിയിച്ചു. സീനിയര് പെണ്കുട്ടികളുടെ ജാവലിന് ത്രോയില് 31.61 മീറ്റര് ദൂരം എറിഞ്ഞ് പൊന്നണിഞ്ഞാണ് എറണാകുളം ജില്ലാ സ്കൂള് ടീമിലെ മികച്ചൊരു മിഡ്ഫീല്ഡര്കൂടിയായ എംലിന് തന്റെ കഴിവ് തെളിയിച്ചത്.
വാശിയേറിയ മത്സരത്തിനൊടുവിലാണ് എംലിന്റെ സ്വര്ണനേട്ടം. അഞ്ചാം ശ്രമം വരെ മുന്നിലായിരുന്ന പത്തനംതിട്ടയുടെ എയ്ഞ്ചലീന് ആന് ടോമിന് (29.40) വെള്ളി നേടി. അവസാന ശ്രമത്തിലാണ് കോതമംഗലം മാര്ബേസില് സ്കൂളിലെ പ്ലസ്ടു വിദ്യാര്ഥിയായ എംലിന് സ്വര്ണദൂരം കണ്ടെത്തിയത്.
ഇത്തവണ സംസ്ഥാന തല ഫുട്ബോള് ചാംപ്യന്ഷിപ്പില് റണ്ണേഴ്സ് അപ്പായ എറണാകുളം ജില്ലാ സ്കൂള് ടീമിലെ മിഡ്ഫീല്ഡറായിരുന്നു. ഫുട്ബോള് കളിച്ചാണ് അത്ലറ്റിക്സിനോടും താല്പര്യം തോന്നിയതെന്ന് എംലിന് പറഞ്ഞു.
മറ്റു ത്രോ ഇനങ്ങള് ചെയ്യുന്നുണ്ടെങ്കിലും ജാവലിനോടാണ് കൂടുതല് താത്പര്യം. എറണാകുളം പിറവം തിരുമാറാടി ചേലകത്തിനാല് വീട്ടില് സാന്ഡി മാര്ക്കോസിന്റെയും വിജിമോളുടെയും മകളാണ് എംലിന്.
