തിരുവനന്തപുരം: മാദ്ധ്യമ പ്രവർത്തകരോട് കയർത്ത മുഖ്യമന്ത്രിയുടെ ശാസ്ത്രഉപദേഷ്ടാവ് എം. സി ദത്തനെ പരിഹസിച്ച് ബിജെപി സംസ്ഥാന അദ്ധ്യക്ഷൻ കെ സുരേന്ദ്രന്റെ ഫേസ്ബുക്ക് പോസ്റ്റ്. പണിയുണ്ടായിരുന്ന കാലത്തൊരു പണിയുമെടുക്കാതെ കൊടിയുമെടുത്തു നടന്നവരെയൊക്കെ ഉപദേഷ്ടാക്കളാക്കി വെച്ച് അതിന്റെ പേരിൽ വീണ്ടും പണിയൊന്നുമെടുക്കാതെ ഖജനാവ് തിന്നുമുടിക്കുന്നവർ പണിയെടുത്തു ജീവിക്കുന്നവനോടു ചോദിക്കുന്നു നിനക്കൊന്നും വേറെ പണിയില്ലേന്ന്. സെക്രട്ടറിയേറ്റുനടയിൽ കണ്ടത് കേരളം തിന്നുതീർക്കാൻ ദത്തെടുത്തവരുടെ ദുർന്നടപ്പെന്ന് അദ്ദേഹം വിമർശിച്ചു.
യുഡി എഫിന്റെ ഉപരോധ സമരത്തിനിടെ സെക്രട്ടേറിയത്തിലെത്തിയ ദത്തനെ പോലീസ് തടഞ്ഞിരുന്നു. മുഖ്യമന്ത്രിയുടെ ശാസ്ത്ര ഉപദേഷ്ടാവാണെന്ന് മാധ്യമപ്രർത്തകർ ശ്രദ്ധയിൽപ്പെടുത്തിയതോടെയാണ് എം.സി ദത്തനെ പോലീസ് കടത്തിവിട്ടത്. എന്നാൽ ബാരിക്കേഡ് കടത്തി വിട്ട ശേഷം മാധ്യമ പ്രവർത്തകരുടെ ചോദ്യങ്ങൾക്ക് ദത്തൻ തട്ടി കയറുകയായിരുന്നു. ആദ്യം വാ പൊത്തിയ ഉപദേഷ്ടാവ്, മുന്നോട്ട് പോയപ്പോള് പൊട്ടിത്തെറിക്കുകയായിരുന്നു.
നിങ്ങൾക്കൊന്നും നാണമില്ലേ തെണ്ടാൻ പൊയ്ക്കൂടേ എന്നായിരുന്നു ആക്രോശം. സംസ്കാര ശൂന്യമായ സംഭാഷണത്തെ മാധ്യമപ്രവര്ത്തകര് ചോദ്യം ചെയ്തെങ്കിലും ദത്തന് പിന്നീട് പ്രതികരിക്കാതെ നീങ്ങുകയായിരുന്നു. യുഡിഎഫിന്റെ ഉപരോധത്തെ തുടര്ന്നാണ് സെക്രട്ടേറിയറ്റും പരിസരും ബാരിക്കേഡ് കെട്ടിയടച്ചിരിക്കുന്നത്.
