കുടുംബശ്രീയുടെ പരിപാടിയിൽ പങ്കെടുത്തില്ലെങ്കിൽ അതിന്റെ ഭവിഷ്യത്ത് അനുഭവിക്കേണ്ടി വരും; അംഗങ്ങളെ ഭീഷണിപ്പെടുത്തി സിഡിഎസിന്റെ വാട്ട്‌സ്ആപ്പ് സന്ദേശം

തിരുവനന്തപുരം: കുടുംബശ്രീയുടെ തിരികെ സ്‌കൂളിലേക്ക് എന്ന പരിപാടിയിൽ നിർബന്ധമായും പങ്കെടുക്കണമെന്ന് അംഗങ്ങൾക്ക് സിഡിഎസിന്റെ ഭീഷണി. പരിപാടിയിൽ പങ്കെടുക്കാതിരുന്നാൽ അതിന്റേതായ ഭവിഷ്യത്ത് നേരിടേണ്ടി വരുമെന്നായിരുന്നു ഭീഷണി. വാട്ട്‌സ് ആപ്പ് ഗ്രൂപ്പുകളിൽ സന്ദേശം അയച്ചാണ് ഭീഷണി മുഴക്കിയത്. പാലക്കാട് കൊഴിഞ്ഞാമ്പാറയിലാണ് സംഭവം.

ക്ലാസിൽ പങ്കെടുത്തില്ലെങ്കിൽ ലോണിനും മറ്റ് ആനുകൂല്യങ്ങൾക്കും എത്തുമ്പോൾ പരിഗണിക്കില്ലെന്ന് സന്ദേശത്തിൽ പറയുന്നു. ക്ലാസിൽ എത്താത്ത കുട്ടികളെ നോട്ട് ചെയ്ത് വെക്കുമെന്നും ബാങ്കിൽ ലോണിന് വേണ്ടി എത്തുമ്പോൾ ഒപ്പിട്ട് തരില്ലെന്നും ഭീഷണി മുഴക്കി.

ഭീഷണിക്കെതിരെ ബിജെപിയുടെ നേതൃത്വത്തിൽ പഞ്ചായത്ത് സെക്രട്ടറിക്ക് പരാതി നൽകി. പരാതിയുടെ അടിസ്ഥാനത്തിൽ സെക്രട്ടറി അന്വേഷണത്തിന് ഉത്തരവിട്ടു.