മേലാറ്റൂര്‍: ഒക്ടോബര്‍ 20 മുതല്‍ 28 വരെ ചൈനയിലെ ഹാങ്ഷൗവില്‍ നടക്കുന്ന ഏഷ്യന്‍ പാരാ ഗെയിംസില്‍ പങ്കെടുക്കുവാന്‍ ഭാരത ബാഡ്മിന്റണ്‍ ടീം ചൈനയില്‍ എത്തി.
കേരളത്തില്‍ നിന്ന് ടീമിനൊപ്പം ആകാശ്, ഗോകുല്‍ ദാസ് സഖ്യവും പവര്‍ ലിഫ്റ്റിങ്ങില്‍ ജോബി മാത്യുവും ഉണ്ട്. കഴിഞ്ഞ ഞായറാഴ്ച ദല്‍ഹിയില്‍ നിന്നാണ് ആകാശും സംഘവും പുറപ്പെട്ടത്. ഉഗാണ്ടയില്‍ നടന്ന ഇന്റര്‍നാഷണല്‍ പാരാ ബാഡ്മിന്റണ്‍ ചാമ്പ്യന്‍ഷിപ്പില്‍ ഭാരതത്തിന് വേണ്ടി ഡബിള്‍സില്‍ സ്വര്‍ണ്ണം നേടിയ ആകാശ്-ഗോകുല്‍ ദാസ് സഖ്യം നിലവിലെ വേള്‍ഡ് റാങ്കിങ്ങില്‍ പത്താമതും ഏഷ്യന്‍ റാങ്കിങ്ങില്‍ നാലാമതും ആണ്.
എസ്എച്ച്ആറ് കാറ്റഗറിയില്‍ ഏഷ്യന്‍ പാരാ ഗെയിംസില്‍ പങ്കെടുക്കുന്ന ആദ്യ കേരളീയരാണ് ഇവര്‍. പരാലിമ്പിക്‌സ് കഴിഞ്ഞാല്‍ ലോകത്തെ ഏറ്റവും വലിയ കായിക മാമാങ്കമാണിത്. കഴിഞ്ഞ ഒരു മാസമായി ലക്‌നൗവില്‍ നടക്കുന്ന ഭാരത ക്യാമ്പില്‍ പരിശീലനത്തിനും, തയ്യാറെടുപ്പിനും ശേഷമാണ് ആകാശും ഗോകുലും യാത്ര തിരിച്ചത്. കോഴിക്കോടുകാരനായ ഗോകുല്‍ കോഴിക്കോട് വികലാംഗ ക്ഷേമ കോര്‍പ്പറേഷനില്‍ താത്ക്കാലികമായി ജോലി ചെയ്തു വരുന്നു. മലപ്പുറം മേലാറ്റൂര്‍ സ്വദേശിയായ ആകാശ് ഡോ. റെഡ്ഡി ഫാര്‍മാ കമ്പനിയില്‍ ജോലി ചെയ്യത് വരുന്നു.
പ്രതികരിക്കാൻ ഇവിടെ എഴുതുക: