ന്യൂദല്ഹി: ചൈനയുടെ സാമ്പത്തികവളര്ച്ച കുറയുകയും ഭാരതം മെച്ചപ്പെട്ട വളര്ച്ചയിലേക്കു തന്നെ കുതിക്കുകയുമാണെന്ന് അന്താരാഷ്ട്ര നാണ്യ നിധി (ഐഎംഎഫ്).
ഭാരതം 2024 സാമ്പത്തിക വര്ഷം പ്രതീക്ഷിച്ചതിനേക്കാള് വളര്ച്ച കൈവരിക്കുമെന്നും ഐഎംഎഫ് വ്യക്തമാക്കി. മുന്പ് നിശ്ചയിച്ചത് 6.1 ശതമാനമായിരുന്നു. എന്നാല് ഭാരതം 6.3ശതമാനം വളര്ച്ച നേടും, ഐഎംഎഫ് അറിയിച്ചു. ഏപ്രില് ജൂണ് പാദത്തില് ഉപഭോഗം പ്രതീക്ഷിച്ചതിനേക്കാള് ശക്തമായതാണ് ഇതിനു കാരണം.
ആര്ബിഐ 6.5 ശതമാനം വളര്ച്ചയാണ് പ്രവചിച്ചിരുന്നത്. ഭാരതം ലോകത്തെ അതിവേഗം വളരുന്ന സമ്പദ് വ്യവസ്ഥയായി തുടരുമെന്ന് ചൂണ്ടിക്കാട്ടിയ ഐഎംഎഫ്, അതേസമയം ആഗോള സമ്പദ് വ്യവസ്ഥ മാന്ദ്യത്തിലാണെന്നും ചൂണ്ടിക്കാട്ടി.
ചൈനയുടെ സാമ്പത്തിക വളര്ച്ച കുറയുകയാണെന്നും ഐഎംഎഫ് ചൂണ്ടിക്കാട്ടി. 2023ല് ചൈന 5.2 ശതമാനം വളരുമെന്ന മുന്വിലയിരുത്തല് തള്ളിയ ഐഎംഎഫ് ഇത് അഞ്ചു ശതമാനം മാത്രമാക്കി വെട്ടിക്കുറച്ചു. 2024ല് ചൈനയുടെ വളര്ച്ച 4.2 ശതമാനം മാത്രമായിരിക്കുമെന്നും വ്യക്തമാക്കി. ഇത് 4.5 ശതമാനം ആയിരിക്കുമെന്നായിരുന്നു കണക്കുകൂട്ടല്.
യൂറോപ്യന് മേഖലയിലെ വളര്ച്ചയും കുറയും. 2023ല് ആഗോള സാമ്പത്തിക വളര്ച്ച മൂന്ന് ശതമാനമായി നിലനിര്ത്തിയ ഐഎംഎഫ്, 202ല് ഇത് 2.9 ശതമാനമായി കുറയുമെന്നും ചൂണ്ടിക്കാട്ടി.
ഭാരതത്തില് വിലക്കയറ്റം വീണ്ടും കുറഞ്ഞു
ഭാരതത്തിലെ വിലക്കയറ്റം വീണ്ടും കുറഞ്ഞതായും റോയിട്ടേഴ്സ് റിപ്പോര്ട്ടു ചെയ്തു. വിലക്കയറ്റം അഥവാ നാണ്യപ്പെരുപ്പം 5.5 ശതമാനമായി കുറഞ്ഞെന്നാണ് അന്താരാഷ്ട്ര വാര്ത്താ ഏജന്സിയായ റോയിട്ടേഴ്സിന്റെ റിപ്പോര്ട്ടിലുള്ളത്. ആര്ബിഐ നിശ്ചയിച്ച സഹിഷ്ണുതാ നിരക്ക് ആറ് ശതമാനമാണ്. അതായത് വിലക്കയറ്റം ആറു ശതമാനത്തില് കൂടാതെ നിയന്ത്രിച്ചു നിര്ത്തണമെന്നാണ് ആര്ബിഐ നിര്ദ്ദേശം. ഭക്ഷണ വില കുറഞ്ഞതാണ് ചില്ലറ നാണ്യപ്പെരുപ്പം(ചില്ലറ വില്പന വിലയിലെ വര്ധന) കുറയാന് ഇടയാക്കിയത്.
