തിരുവനന്തപുരം: തിരുവനന്തപുരം ജില്ലയില് ഭര്ത്താവിന്റെയും ഭര്ത്തൃബന്ധുക്കളുടെയും ഭാഗത്തുനിന്നുണ്ടാകുന്ന പ്രശ്നങ്ങളുമായി ബന്ധപ്പെട്ട പരാതികള് വര്ധിക്കുന്നതായി വനിതാ കമ്മീഷന്. വിവാഹം കഴിഞ്ഞ് ചുരുങ്ങിയ കാലയളവിനുള്ളിലാണ് ഇത്തരത്തിലുള്ള പ്രശ്നങ്ങള് ഉണ്ടാകുന്നത്. വിവാഹ ബന്ധത്തെക്കുറിച്ചോ, കുടുംബബന്ധത്തെ കുറിച്ചോ, ദാമ്പത്യബന്ധത്തെ കുറിച്ചോ കൃത്യമായ ധാരണ ഇല്ലാത്തതാണ് പ്രശ്നങ്ങള്ക്ക് കാരണം. വിവാഹം രജിസ്റ്റര് ചെയ്യുന്ന സമയത്ത് വിവാഹപൂര്വ കൗണ്സിലിംഗിന് വിധേയമായിട്ടുണ്ടെന്ന സര്ട്ടിഫിക്കറ്റ് ഉണ്ടാകണം എന്ന നിര്ദേശം വനിത കമ്മിഷന് സര്ക്കാരിന് സമര്പ്പിച്ചിട്ടുണ്ട്.
വനിത കമ്മിഷന് ജില്ലാതല അദാലത്തില് വിവാഹപൂര്വ കൗണ്സിലിംഗിന്റെ അനിവാര്യത വ്യക്തമാക്കുന്നതാണ് കമ്മിഷനു മുന്നില് വന്നിട്ടുള്ള പരാതികളില് ഏറെയും.അദാലത്തില് എത്തിയത് 250 കേസുകള്. തീര്പ്പാക്കാനായത് വെറും 11 എണ്ണം മാത്രം. 230 കേസുകള് അടുത്ത അദാലത്തിലേക്കു മാറ്റി. മൂന്നു കേസുകള് റിപ്പോര്ട്ടിനായി അയച്ചു. ആറു കേസുകളില് കൗണ്സിലിംഗിനു നിര്ദേശിച്ചു.
സ്ത്രീ വിരുദ്ധമായ സമീപനം ഉണ്ടാകുന്ന ഏതിടങ്ങളിലും വനിത കമ്മിഷന് ഇടപെടുമെന്ന് വനിത കമ്മിഷന് അധ്യക്ഷ അഡ്വ. പി. സതീദേവി പറഞ്ഞു.
മറ്റൊരു പ്രധാന കാര്യം തൊഴിലിടങ്ങളിലുണ്ടാകുന്ന പ്രശ്നങ്ങളാണ്. കേരളത്തിലെ എല്ലാ ജില്ലകളിലും അണ്എയ്ഡഡ് വിദ്യാഭ്യാസ സ്ഥാപനങ്ങളില് ജോലി ചെയ്യുന്നതില് ഭൂരിപക്ഷവും സ്ത്രീകളാണ്. ബിരുദാനന്തര ബിരുദവും ബിരുദവും ഉളള വിദ്യാസമ്പന്നരായ സഹോദരിമാര് നാമമാത്രമായ വേതനം കൈപ്പറ്റിക്കൊണ്ട് ജോലി ചെയ്യേണ്ടി വരുന്ന സന്ദര്ഭമാണ് അണ് എയ്ഡഡ് വിദ്യാഭ്യാസ സ്ഥാപനങ്ങളില് ഉള്ളത്. വര്ഷങ്ങളോളം ജോലി ചെയ്ത ശേഷം പലപ്പോഴും വനിത ജീവനക്കാരെ യാതൊരു കാരണവുമില്ലാതെ ജോലിയില് നിന്നും ഒഴിവാക്കുന്നുണ്ട്. തിരുവനന്തപുരം ഉള്പ്പെടെ എല്ലാ ജില്ലകളിലും കമ്മിഷന് മുന്പാകെ ഇത്തരം പരാതികള് ലഭിച്ചിട്ടുണ്ട്. മതിയായ ആനുകൂല്യമോ, ജോലി ചെയ്തതിനുള്ള ശമ്പളമോ നല്കാതെ അധ്യാപികമാരെ പുറത്താക്കുന്നത് വളരെ ഗൗരവമേറിയ പ്രശ്നമായാണ് വനിത കമ്മിഷന് കാണുന്നത്.
വൃദ്ധരായ മാതാപിതാക്കളെ സംരക്ഷിക്കാത്ത സമീപനം മക്കളുടെ ഭാഗത്തുനിന്നും ഉണ്ടാകുന്നുണ്ട്. പെന്ഷന് ആനുകൂല്യങ്ങള് കൈപ്പറ്റിയ ശേഷം വയോധികയായ തന്നെ മകള് സംരക്ഷിക്കുന്നില്ലെന്ന അമ്മയുടെ പരാതി സിറ്റിംഗില് പരിഗണനയ്ക്കെത്തി. അമ്മയില്നിന്നും കൈപ്പറ്റിയ വസ്തുവകകളും പെന്ഷന് ആനുകൂല്യങ്ങളും ഉള്പ്പെടെ തിരിച്ചു നല്കി അവരെ സംരക്ഷിക്കുന്നതിന് മകള്ക്ക് നിര്ദേശം നല്കി പരാതി തീര്പ്പാക്കി.
പോഷ് ആക്ട് അനുസരിച്ച് സര്ക്കാര് അധീനതയിലുള്ള സ്ഥാപനത്തിലെ ബന്ധപ്പെട്ടവര്ക്കെതിരേ നടപടി സ്വീകരിച്ചതിന്റെ റിപ്പോര്ട്ട് സിറ്റിംഗില് ലഭിച്ചു.
