ഇടുക്കി : സിപിഐ ഇടുക്കി മുന്‍ ജില്ലാ സെക്രട്ടറി കെ.കെ ശിവരാമന് കൈയേറ്റത്തെ കുറിച്ച് പറയാന്‍ യോഗ്യതയില്ലെന്ന് എം എം മണി എം എല്‍ എ. തന്നെ തേജോവധം ചെയ്യാനാണ് ശിവരാമന് ആവശ്യമില്ലാത്തത് പറയുന്നതെന്നും എം.എം മണി കുറ്റപ്പെടുത്തി. അതേസമയം ശിവരാമന് പിന്തുണയുമായി സിപിഐ ജില്ലാ നേതൃത്വം രംഗത്ത് വന്നു.
അയാള്‍ക്ക് എന്നാ സൂക്കേട് ആണെന്ന് പിടികിട്ടിയിട്ടില്ല. തനിക്ക് മറുപടി പറയാന്‍ ശിവരാമന് ആരാണെന്നും ആരുടെയും മറുപടി പ്രതീക്ഷിക്കാത്ത മനുഷ്യനാണ് താനെന്നും മണി പറഞ്ഞു. മൂന്നാറിലെ കൈയേറ്റങ്ങള്‍ സംബന്ധിച്ച് സംസാരിക്കാന്‍ തൊടുപുഴയിലുള്ള ശിവരാമന് യോഗ്യതയില്ലെന്നും മണി പറഞ്ഞു.
എന്നാല്‍ ശിവരാമന് പറഞ്ഞത് പാര്‍ട്ടി നിലപാടാണെന്ന് സി പി ഐ ജില്ലാ നേതൃത്വം അറിയിച്ചു. വന്‍കിട കൈയേറ്റങ്ങള്‍ ഒഴിപ്പിക്കണമെന്നത് പാര്‍ട്ടി നിലപാടാണ്. എം.എം മണിയുടെ അഭിപ്രായത്തോട് യോജിക്കുന്നില്ല. റവന്യൂ വകുപ്പ് സിപിഐയില്‍ നിന്ന് മാറ്റണമെന്ന ആവശ്യം മണി മുഖ്യമന്ത്രിയോടാണ് ഉന്നയിക്കേണ്ടതെന്നും സിപിഐ ഇടുക്കി ജില്ലാ സെക്രട്ടറി കെ സലിം കുമാര്‍ പറഞ്ഞു.
പ്രതികരിക്കാൻ ഇവിടെ എഴുതുക: