ഉദുമ: ഹയര് സെക്കന്ഡറി ഒന്നും രണ്ടും വര്ഷ പൊതുപരീക്ഷയുടെ മൂല്യനിര്ണയം കഴിഞ്ഞ് ആറുമാസം കഴിഞ്ഞിട്ടും പ്രതിഫലമില്ലാതെ അധ്യാപകര്. 2023 ഏപ്രില് മാസത്തില് നടന്ന ഹയര് സെക്കന്ഡറി പരീക്ഷകളുടെ മൂല്യനിര്ണയത്തിന്റെ പ്രതിഫലം തടഞ്ഞുവെച്ചതായാണ് അധ്യാപകരുടെ പരാതി.
ഒന്നാംവര്ഷ പരീക്ഷാഫലം മെച്ചപ്പെടുത്താനുള്ള ഇംപ്രൂവ്മെന്റ് പരീക്ഷയുടെ മുഴുവന് ഫീസും സ്വീകരിച്ച് ഒക്ടോബര് ഒന്പതിന് പരീക്ഷ ആരംഭിക്കാനിരിക്കുമ്പോഴും മാസങ്ങള്ക്കു മുന്പേ നടന്ന മൂല്യനിര്ണയ ജോലിയുടെ പ്രതിഫലമാണ് ലഭ്യമാകാതിരിക്കുന്നത്.അതേസമയം ഹയര് സെക്കന്ഡറി മൂല്യനിര്ണയത്തോടൊപ്പം നടന്ന എസ്എസ്എല്സി പരീക്ഷാ മൂല്യനിര്ണയത്തിന്റെ മുഴുവന് പ്രതിഫലവും അധ്യാപകര്ക്ക് കൃത്യമായി വിതരണം ചെയ്തിട്ടുണ്ട്.
പരീക്ഷകള്ക്കുള്ള അറിയിപ്പ് പുറത്തിറങ്ങി രണ്ടോ മൂന്നോ ദിവസത്തിനുള്ളില് യുദ്ധകാലടിസ്ഥാനത്തിലാണ് ഹയര് സെക്കന്ഡറി വിദ്യാര്ഥികളില്നിന്ന് ഉയര്ന്ന തോതിലുള്ള പരീക്ഷാഫീസ് പിരിച്ചെടുക്കുന്നത്. ഒന്നും രണ്ടും വര്ഷ പരീക്ഷകള്ക്ക് യഥാക്രമം 240, 270 രൂപ വിതവും സേ പരീക്ഷയ്ക്ക് ഒരു പേപ്പറിന് 150 രൂപ വീതവും പുനര്മൂല്യനിര്ണയത്തിന് പേപ്പറ് ഒന്നിന് 500 രൂപയുമാണ് ഫീസ്. ഈ തുക ലഭ്യമാണെന്നിരിക്കെ ഹയര് സെക്കന്ഡറി പരീക്ഷയുമായി ബന്ധപ്പെട്ട ജോലികളുടെ പ്രതിഫല കാര്യത്തില് മാത്രം മാസങ്ങളായി തുടരുന്ന കാലതാമസം ഈ മേഖലയോടുള്ള അവഗണനയാണെന്ന് അധ്യാപക സംഘടനകള് ചൂണ്ടിക്കാട്ടുന്നു.
80 ക്യാമ്പുകളിലായി നടന്ന ഹയര് സെക്കന്ഡറി കേന്ദ്രീകൃത മൂല്യനിര്ണയത്തിന്റെ പ്രതിഫലം നല്കുന്നതിന് ചെലവുവരുന്ന 30.4 കോടി രൂപയുടെ സ്ഥാനത്ത് 8.9 കോടി രൂപ മാത്രമാണ് എല്ലാ ക്യാമ്പുകളിലേക്കുമായി അനുവദിച്ചത്. ആകെ വേണ്ട തുകയുടെ നാലിലൊന്ന് തുക മാത്രം അനുവദിച്ചതിനാല് കേവലം 25 ശതമാനം അധ്യാപകര്ക്ക് മാത്രമാണ് പ്രതിഫലം ലഭ്യമായത്. പ്രത്യേക പരീക്ഷാ ഫീസ് ഇല്ലാത്ത എസ്എസ്എല്സി പരീക്ഷാ ജോലിക്കും മൂല്യനിര്ണയത്തിനും സമയബന്ധിതമായി പ്രതിഫലം ലഭ്യമാക്കിയപ്പോള് ഹയര് സെക്കന്ഡറി മേഖലയില് മാസങ്ങളായി പ്രതിഫലം തടഞ്ഞുവെക്കുന്ന നടപടി അംഗീകരിക്കാനാകില്ലെന്ന് അധ്യാപകര് പറയുന്നു. പരീക്ഷാ ജോലിയുമായി ബന്ധപ്പെട്ട് പിരിച്ചെടുക്കുന്ന ഫീസ് വകമാറ്റുന്നതിന്റെ ഭാഗമായാണ് പ്രതിഫലം നല്കാനാവാത്ത സാഹചര്യമുള്ളതെന്നും അധ്യാപകര് പരാതിപ്പെടുന്നു.
