ന്യൂദല്ഹി: ജോലി നല്കിയതിന് കോഴയായി ഭൂമി സ്വീകരിച്ച കേസില് ബിഹാര് മുന് മുഖ്യമന്ത്രി ലാലു പ്രസാദ് യാദവിന് ജാമ്യം. ബിഹാര് മുന് മുഖ്യമന്ത്രിയും ലാലുവിന്റെ ഭാര്യയുമായ റാബ്രി ദേവിക്കും ബിഹാര് ഉപമുഖ്യമന്ത്രിയും ലാലുവിന്റെ മകനുമായ തേജസ്വി യാദവിനും ഈ കേസില് ദല്ഹി റോസ് അവന്യൂ കോടതി ജാമ്യം അനുവദിച്ചു. ലാലു പ്രസാദ് യാദവിന്റെ മകളും ആര്ജെഡി എംപിയുമായ മിസാ ഭാരതിക്കും ജാമ്യം അനുവദിച്ചു.
2004-2009 കാലത്ത് ലാലു പ്രസാദ് റെയില്വേ മന്ത്രിയായിരിക്കെ ഇന്ത്യന് റെയില്വേയുടെ വിവിധ സോണുകളിലെ ഗ്രൂപ്പ് ഡി തസ്തികകളിലേക്ക് മാനദണ്ഡങ്ങളും നിയമന നടപടിക്രമങ്ങളും ലംഘിച്ച് നിയമനം നടത്തിയെന്നാണ് ആരോപണം. ഈ നിയമനങ്ങള് നടത്തിയതിന് പകരമായി ഭൂമി പാരിതോഷികമായി സ്വീകരിച്ചെന്ന് ആരോപിച്ചാണ് കേസ്.
പരസ്യമോ പൊതു അറിയിപ്പോ നല്കിയല്ല നിയമനം നടത്തിയത്.റെയില്വേ ഭൂമി തട്ടിപ്പ് കേസില് ആര്ജെഡി അധ്യക്ഷന് ലാലുപ്രസാദ് യാദവിന്റെയും കുടുംബത്തിന്റെയും ആറ് കോടി വില വരുന്ന സ്വത്തുക്കള് ഇഡി കണ്ടുകെട്ടിയിട്ടുണ്ട്.ദല്ഹി,പട്ന എന്നിവിടങ്ങളിലെ സ്വത്തുക്കളാണ് കണ്ടുകെട്ടിയത്.
