അന്തിക്കാട്: ദേവി സ്മരണയുടെ മറ്റൊരു രൂപമായി പെരിങ്ങോട്ടുകര ദേവസ്ഥാനത്ത് നടന്ന സുവാസിനി പൂജ ഭക്തിനിര്‍ഭരമായി. ചലച്ചിത്ര അഭിനേത്രിയും ദേശീയ വനിതാ കമ്മീഷന്‍ അംഗവുമായ ഖുശ്ബുവാണ് സുവാസിനി പൂജയില്‍ പീഠാരൂഢയായത്.
ക്ഷീരജലം കൊണ്ട് പാദം കഴുകിയാണ് പൂജയ്‌ക്ക് തുടക്കമായത്. ജലം, ചന്ദനം, കുങ്കുമം, അക്ഷതപുഷ്പം എന്നിവകളെ കൊണ്ട് പഞ്ച ഉപചാരങ്ങളോടെ മഹാദേവി സങ്കല്പത്തിലുള്ള പൂജയാണ് ദേവസ്ഥാനാ ധിപതി ഉണ്ണി ദാമോദരന്റെ മുഖ്യ കാര്‍മികത്വത്തില്‍ നടന്നത്. നൂറിലധികം അമ്മമാരുടെ ലളിതാസഹസ്രനാമ അകമ്പടിയോടെയായിരുന്നു സുവാസിനി പൂജ.
പൂജയ്‌ക്കുശേഷം പൂജിച്ച ഫല പഴവര്‍ഗങ്ങളും ദേവസ്ഥാനാധിപതി ഉണ്ണി ദാമോദരന്‍ ഖുശ്ബുവിന് നല്‍കി. പൂജയ്‌ക്ക് എത്തിയ നടി ഖുശ്ബുവിനെ പൂര്‍ണ്ണ കുംഭംനല്‍കിയാണ് ദേവസ്ഥാനം ആദരിച്ചത്. കെ.ഡി. വേണുഗോപാല്‍, കെ.ഡി. ദേവദാസ്, കെ.യു. സ്വാമിനാഥന്‍, ഡോ. പൂര്‍ണ്ണത്രയീ ജയപ്രകാശ് ശര്‍മ എന്നിവരും പൂജയ്‌ക്ക് നേതൃത്വം നല്‍കി. തുടര്‍ന്ന് കളംപാട്ട് ഉത്സവത്തിന്റെ ഭാഗമായുള്ള മഹാരൂപക്കളവും നടന്നു.
പ്രതികരിക്കാൻ ഇവിടെ എഴുതുക: