ഇടുക്കി: കയ്യേറ്റം ഒഴിപ്പിച്ച് റവന്യു വകുപ്പ്. ഇടുക്കി വാഗമൺ മൊട്ടക്കുന്നിന് സമീപം അഞ്ചേക്കറോളം ഭൂമിയിലെ കയ്യേറ്റമാണ് ഒഴിപ്പിച്ചത്. ഇതിന് പിന്നാലെ തിരിച്ചുപിടിച്ച സ്ഥലത്ത് സർക്കാർ ഭൂമിയെന്ന് അടയാളപ്പെടുത്തുന്ന ബോർഡ് സ്ഥാപിക്കാനാണ് ഉദ്യോഗസ്ഥരുടെ നീക്കം.
നാട്ടുകാർ പരാതിപ്പെട്ടതോടെയാണ് ഒഴിപ്പിക്കൽ നടപടികളുമായി റവന്യു വകുപ്പ് രംഗത്തെത്തിയത്. വാഗമൺ കൊച്ചുകരുന്തരുവി റോഡിലെ അഞ്ചേക്കറോളം വരുന്ന റവന്യു ഭൂമിയിലാണ് സ്വകാര്യ വ്യക്തി ഒരാഴ്ചയോളമായി വേലി കെട്ടി തിരിക്കുന്ന ജോലികൾ നടത്തി വന്നിരുന്നത്. വിനോദ സഞ്ചാര സാധ്യത മുന്നിൽ കണ്ടായിരുന്നു കയ്യേറ്റമെന്നാണ് വിലയിരുത്തൽ.
രേഖയുണ്ടെന്ന് വാദിച്ചായിരുന്നു കയ്യേറ്റക്കാർ സ്ഥലത്ത് ജോലികൾ ചെയ്തിരുന്നത്. തുടർന്ന് നടത്തിയ പരിശോധനയിലാണ് കയ്യേറ്റമാണെന്ന് തെളിഞ്ഞത്. തുടർന്ന് പീരുമേട് റവന്യു വിഭാഗം സ്‌പെഷ്യൽ സ്‌ക്വാഡാണ് സ്ഥലത്തെത്തി കയ്യേറ്റം ഒഴിപ്പിച്ചത്.
പ്രതികരിക്കാൻ ഇവിടെ എഴുതുക: