ന്യൂദല്‍ഹി: ഇന്ത്യയില്‍ നടക്കുന്ന ക്രിക്കറ്റ് ലോകകപ്പിനെ ‘ലോക ഭീകരകപ്പാ’ക്കി മാറ്റുമെന്ന ഭീഷണിയുമായി ഖാലിസ്ഥാന്‍ ഭീകരവാദി ഗുര്‍പത് വന്ത് സിങ്ങ് പന്നുന്‍. ഇതിനെതിരെ ഗുജറാത്ത് പൊലീസ് കേസെടുത്തിരിക്കുകയാണ്.
ഇന്ത്യ നേരത്തെ നിരോധിച്ച ഖലിസ്ഥാന്‍ സംഘടനയാണ് സിഖ് ഫോര്‍ ജസ്റ്റിസ് (എസ് എഫ് ജെ) എന്ന സംഘടന.. ഗുജറാത്തിലെ അഹമ്മദാബാദില്‍ നടക്കുന്ന ഇന്ത്യാ-പാക് മത്സരത്തിലാണ് ഭീകരപ്രവര്‍ത്തനം അഴിച്ചുവിടുമെന്ന് ഗുര്‍പത് വന്ത് സിങ്ങ് ഭീഷണി മുഴക്കിയിരിക്കുന്നത്. പന്നുന്റെ ശബ്ദസന്ദേശമാണ് പ്രചരിക്കുന്നതെന്ന് അഹമ്മദാബാദ് പൊലീസിലെ സൈബര്‍ ക്രൈം ബ്രാഞ്ച് പറഞ്ഞു. ഒരു വിദേശ ഫോണ്‍ നമ്പറില്‍ നിന്നാണ് ഇന്ത്യയിലേക്ക് ഈ നമ്പര്‍ അയച്ചിരിക്കുന്നത്.
ഈ ശബ്ദ സന്ദേശം കിട്ടിയ പലരും പൊലീസിനെ സമീപിക്കുകയായിരുന്നു. ഒക്ടോബര്‍ അഞ്ചിന് ആരംഭിയ്‌ക്കുന്നത് ക്രിക്കറ്റ് ലോകകപ്പല്ല, ആഗോള ഭീകരകപ്പിന്റെ ആരംഭമാണെന്നാണ് ശബ്ദസന്ദേശം.
നേരത്തെ ജി20 ഉച്ചകോടി നടക്കുമ്പോള്‍ കാനഡയിലിരുന്ന് മോദിയെയും അമിത് ഷായെയും വധിക്കുമെന്ന് ഗുര്‍പത് വന്ത് സിങ്ങ് പന്നുന്‍ ഭീഷണി മുഴക്കിയിരുന്നു. അതുപോലെ, കാനഡയിലെ ഇന്ത്യാക്കാരായ ഹിന്ദുക്കള്‍ ഇന്ത്യയിലേക്ക് പോകണമെന്ന ഗുര്‍പത് വന്ത് സിങ്ങിന്റെ ഭീഷണി ഇന്ത്യക്കാര്‍ക്കിടയില്‍ ആശങ്ക നിറച്ചിരുന്നു. 2020ലെ ഒരു കേസുമായി ബന്ധപ്പെട്ട് ഗുര്‍പത് വന്ത് സിങ്ങ് പന്നുന്റെ പഞ്ചാബിലെ അമൃതസറിനടുത്തുള്ള കൃഷിഭൂമി കഴിഞ്ഞ ദിവസം കേന്ദ്ര രഹസ്യാന്വേഷണ ഏജന്‍സികള്‍ കണ്ടുകെട്ടിയിരുന്നു.
പ്രതികരിക്കാൻ ഇവിടെ എഴുതുക: