മങ്കൊമ്പ്: ആളില്ലാത്ത വീടിന്റെ മേല്ക്കൂര പൊളിച്ച് മോഷണം. പുളിങ്കുന്ന് ഗ്രാമ പഞ്ചായത്ത് 15-ാം വാര്ഡ് മങ്കൊമ്പ് നാല്പതില് കൊട്ടാരത്തില് കെ.നാരായണന്റെ വീട്ടിലാണു മോഷണം നടന്നത്. ചെമ്പു പാത്രങ്ങളും ഓട്ടുവിളക്കുകളും അടക്കം മോഷണം പോയി.
50,000 രൂപയുടെ നഷ്ടമാണു കണക്കാക്കുന്നത്. കഴിഞ്ഞ ദിവസം രാത്രിയിലാണു മോഷണം നടന്നത്. പഴയ നാലുകെട്ടു കെട്ടിടത്തിന്റെ മേല്ക്കൂരയിലെ ഓട് ഇളക്കിയശേഷം പട്ടിക തകര്ത്ത് ഉള്ളില് കയറി നിലവറയുടെ രണ്ട് താഴുകള് തകര്ത്താണു മോഷണം.
എറണാകുളത്തു താമസിക്കുന്ന ഉടമ വെള്ളിയാഴ്ച നാട്ടിലെത്തി തിങ്കള് രാവിലെയാണു തിരികെ പോയത്.
ചൊവ്വാ പകല് സ്ഥലത്ത് എത്തിയ കാര്യസ്ഥന് വീടു തകര്ത്ത നിലയില് കണ്ടെത്തിയതോടെ ഉടമയെ വിവരം അറിയിച്ചു. നാട്ടിലെത്തിയ ഉടമ നടത്തിയ പരിശോധയിലാണു ചെമ്പുപാത്രങ്ങള് അടക്കം മോഷണം പോയതായി കണ്ടെത്തിയത്. പുളിങ്കുന്ന് പോലീസില് പരാതി നല്കി.
